რუსეთის პრეზიდენტმა ვლადიმერ პუტინმა განაცხადა, რომ მას არ სჭირდება ბირთვული იარაღი უკრაინის წინააღმდეგ ომში მიზნების მისაღწევად, მაგრამ დასავლეთმა არ უნდა იფიქროს, რომ რუსეთი მათ არასოდეს გამოიყენებს. მოსკოვმა გააკეთა გზავნილი, მას შემდეგ, რაც ნატოს მოკავშირეებმა უკრაინული ძალების დახმარება გააძლიერეს, ეს მიუთითებს იმაზე, თუ რა შეიძლება იყოს ომის ყველაზე საშიში ეტაპი, - ამის შესახებ Associated Press წერს.

ტრენინგი, მუქარა და სიგნალები

მოსკოვმა ჩაატარა წვრთნები - ბირთვული იარაღის გამოყენებით რუსეთის სამხრეთით და მოკავშირე ბელორუსიაში. რუსეთის თავდაცვის სამინისტროს ვიდეოში ნაჩვენები იყო ისკანდერის გამშვები სადგურები, სამხედრო თვითმფრინავები, რომლებსაც შეუძლიათ ბირთვული იარაღის ტარება. 

მას შემდეგ, რაც უკრაინაში შეჭრა დაიწყო 2022 წლის 24 თებერვალს, პუტინმა არაერთხელ მიმართა ბირთვულ რიტორიკას, რათა დასავლეთი კონფლიქტში არ ჩარეულიყო. შეერთებულმა შტატებმა და ნატომ გააკრიტიკეს ბირთვული იარაღის, შესაძლო, გამოყენება.

უკრაინაში თავდაპირველი წარუმატებლობის შემდეგ, პუტინმა განაცხადა, რომ მოსკოვი მზად არის გამოიყენოს „ყველა საშუალება“ რუსეთის ტერიტორიის დასაცავად, რაც აძლიერებს შიშს, რომ შესაძლოა, მიმართოს ტაქტიკურ ბირთვულ იარაღს კიევის წინსვლის შესაჩერებლად. პუტინმა მოგვიანებით შეარბილა თავისი რიტორიკა მას შემდეგ, რაც უკრაინის 2023 წლის კონტრშეტევამ ვერ მიაღწია მიზნებს.

როგორც გამოცემა წერს, რუსეთის ბოლო სამხედრო წარმატებების ფონზე, პუტინმა განაცხადა, რომ მოსკოვს არ სჭირდება ბირთვული იარაღი უკრაინაში ომის მოსაგებად. ამავე დროს, მან გააფრთხილა, რომ კიევის დარტყმები რუსეთის ტერიტორიაზე დასავლეთის მიერ მოწოდებული შორი დისტანციური იარაღის გამოყენებით, ნიშნავს სერიოზულ ესკალაციას.

ივნისის ფორუმზე სანქტ-პეტერბურგში, კრემლთან დაკავშირებულმა საგარეო პოლიტიკის ექსპერტმა სერხი კარაგანოვმა მოუწოდა პუტინს, ატომური იარაღი გამოიყენოს უკრაინაში გამარჯვების მისაღწევად.

პუტინმა ფრთხილი რეაგირება მოახდინა და დასძინა, რომ ვერ ხედავს საფრთხეებს, რაც გაამართლებს რუსეთის ბირთვული არსენალის გამოყენებას. ამასთან, მან აღნიშნა, რომ მოსკოვი განიხილავს ცვლილებებს ბირთვულ დოქტრინაში.

ბირთვული დოქტრინის შეცვლა

ომის დაწყებიდან მოყოლებული რუსეთის წარმომადგენლები დაჟინებით მოითხოვდნენ დოქტრინის გადახედვას, ზოგიერთი მათგანი ამტკიცებდა, რომ ეს ბარიერი ძალიან მაღალია, რაც დასავლეთს უტოვებს შთაბეჭდილებას, რომ კრემლი არასოდეს შეეხება მის ბირთვულ არსენალს.

მას შემდეგ, რაც დასავლეთმა უკრაინას რუსეთის ტერიტორიაზე დარტყმის ნება დართო, პუტინი მათ საპასუხო ქმედებით დაემუქრა - დასავლელი მოწინააღმდეგეების შეიარაღებით მთელ მსოფლიოში. მან ხელი მოაწერა ორმხრივ თავდაცვის პაქტს ჩრდილოეთ კორეასთან, რითაც ცხადყო, რომ მოსკოვს შეუძლია დაიწყოს იარაღის მიწოდება ფხენიანისთვის.

როგორ მედია იხსენებს, პუტინმა განაცხადა, რომ მოსკოვი დაიწყებს საშუალო რადიუსის რაკეტების წარმოებას, რომელიც აკრძალულია. კრემლს არ უთქვამს, სად შეიძლება მოსკოვმა განათავსოს ახალი იარაღი, რომელიც აკრძალულია. 

შესაძლო ესკალაციის ნაბიჯები შეიძლება მოიცავდეს კიბერშეტევებს ამერიკულ და ევროპულ ინფრასტრუქტურაზე, ჩვეულებრივი იარაღით დარტყმები დასავლეთის ჯარების წინააღმდეგ, თუ ისინი განლაგდებიან უკრაინაში, ასევე თავდასხმები კიევის სამხედრო მომარაგების ცენტრებზე ნატოს წევრი ქვეყნების ტერიტორიაზე. ექსპერტების თქმით, შესაძლოა აშშ-ის სამხედრო ბაზები იყოს სამიზნე.

გარდა ამისა, რუსეთი შესაძლოა, დაემუქროს ევროპას ნატოს ობიექტებზე ბირთვული დარტყმით, რათა აიძილოს მოწინააღმდეგე დაჯდეს მოლაპარაკების მაგიდასთან.

ბირთვული იარაღის გამოყენების საფრთხე

„აზოვის“ პოლკის ყოფილი მეთაური, მაიორი, მესამე ცალკეული თავდასხმის ბრიგადის მეთაურის მოადგილე მაქსიმ ჟორინი მიიჩნევს, რომ ბირთვული იარაღის გამოყენება შესაძლებელია. უფრო მეტიც, როგორც რუსეთის ფედერაციის, ასევე ბელორუსიის ტერიტორიიდან.

მისი თქმით, არ უნდა დაგვავიწყდეს „რა დროში ვცხოვრობთ და ვისთან გვაქვს საქმე“.

მანამდე დაზვერვის მთავარმა დირექტორატმა შეაფასა კრემლის ბირთვული საფრთხეები. დაზვერვაში ამბობენ, რომ ამ მომენტში საუბარია მხოლოდ ბირთვულ შანტაჟზე, რომელსაც ის წლების განმავლობაში იყენებს.