უკრაინის პრეზიდენტ ვოლოდიმირ ზელენსკის და აშშ-ის პრეზიდენტ დონალდ ტრამპს შორის მოლაპარაკებების ახალმა რაუნდმა ხელშესახები გარღვევა არ მოიტანა, თუმცა მან საშუალება მოგვცა თავიდან აგვეცილებინა სცენარები, რომლებიც ადრე კიევის პოზიციებს აზიანებდა. დიალოგის გაგრძელების ფაქტიც კი დიპლომატიურ გამარჯვებად ითვლება, - წერს The New York Times.

ფლორიდაში შეხვედრის შემდეგ, ტრამპმა ნათლად განაცხადა, რომ მოლაპარაკებებიდან არ გადიოდა, მიუხედავად მისი წინა მუქარისა, რომ თუ სწრაფი პროგრესი არ იქნებოდა მიღწეული, შეწყვეტდა მოლაპარაკებებს. მან, ასევე, უარი თქვა მის მიერ ადრე დადგენილ მკაცრ ვადებზე, როგორიცაა მადლიერების დღე ან შობა.

„მე არ მაქვს ვადები. იცით, რა არის ჩემი ბოლო ვადა? დაასრულეთ ომი“, - განუცხადა ტრამპმა ჟურნალისტებს.

როგორც მედია წერს, კიევისთვის მნიშვნელოვანი სიგნალი იყო ის, რომ ამერიკის პრეზიდენტმა ამჯერად არ გაიმეორა კრემლის მაქსიმალისტური მოთხოვნები უკრაინისგან ტერიტორიული დათმობების შესახებ. ეს განსაკუთრებით მნიშვნელოვნად ჩანდა იმის გათვალისწინებით, რომ ზელენსკისთან შეხვედრამდე უშუალოდ ტრამპს სატელეფონო საუბარი ჰქონდა ვლადიმერ პუტინთან - ფორმატი, რომელმაც წარსულში უკვე შეარყია უკრაინის პოზიციები.

ზელენსკის თქმით, მოლაპარაკებებს დისტანციურად რამდენიმე ევროპელი ლიდერიც შეუერთდა და შესაძლოა, აშშ-მა ახალ რაუნდს უკვე მომავალ თვეში ორგანიზება გაუწიოს უფრო ფართო საერთაშორისო მონაწილეობით.

„ჩვენ ყველა თემაზე მართლაც შესანიშნავი დისკუსია გვქონდა და ვაფასებთ ბოლო კვირების განმავლობაში ამერიკული და უკრაინული გუნდების მიერ მიღწეულ პროგრესს“, - განაცხადა უკრაინის პრეზიდენტმა და აღიარა, რომ სამშვიდობო შეთანხმების პროექტში „რამდენიმე რთული საკითხი“ რჩება.

მედიის ცნობით, მათ შორისაა აღმოსავლეთ უკრაინის ტერიტორიების ბედი და რუსეთის მიერ ოკუპირებული ატომური ელექტროსადგური. ზელენსკიმ, ასევე, დაადასტურა, რომ კიევის თქმით, სამშვიდობო გეგმა დაახლოებით 90%-ით მზადაა და უკრაინა, აშშ-სთან და ევროპელ პარტნიორებთან ერთად, თითქმის შეთანხმდა მომავალი უსაფრთხოების გარანტიების პარამეტრებზე.

ცალკე, უკრაინის პრეზიდენტმა ახსენა დემილიტარიზებული ზონის კომპრომისული იდეა, საიდანაც როგორც უკრაინული, ასევე, რუსული ჯარები უნდა გაიყვანონ.

„სიტყვა „შეთანხმება“ ძალიან ძლიერი სიტყვაა“, - აღნიშნა მან და დასძინა, რომ მხარეები მხოლოდ „უახლოვდებიან“ შეთანხმებებს, განსაკუთრებით ტერიტორიულ საკითხთან დაკავშირებით.

კიევში გამართული მოლაპარაკებების ყველაზე იმედის მომცემ შედეგად აშშ-ის მიერ დიალოგის გაგრძელებისა და შემდეგ რაუნდში ევროპელი ლიდერების სრულუფლებიან მონაწილეებად ჩართვის მზაობა ითვლება. ამან, შესაძლოა, გააძლიეროს უკრაინის პოზიცია და შეამციროს მოსკოვის მხრიდან ბოლო წუთს ზეწოლის რისკი.