გავრცელებული ინფორმაციის ფონზე, რომ აშშ „ჰამასის“ განიარაღების გეგმის შემუშავებამდე ღაზას ნაწილების აღდგენის პროცესის გაგრძელებას განიხილავს, ისრაელის პრემიერ-მინისტრი ბენიამინ ნეთანიაჰუ პირობას დებს, რომ ტერორისტული დაჯგუფება განიარაღდება.

„ჰამასის“ მიერ კონტროლირებადი ღაზას ნაწილების „ე.წ. არადემილიტარიზაციის“ საკითხზე საუბრისას ნეთანიაჰუმ ყოველკვირეული კაბინეტის სხდომის დასაწყისში განაცხადა, რომ „ასეთი რამ არ მოხდება“.

„20-პუნქტიანი გეგმის მიხედვით და ნებისმიერ სხვა შემთხვევაში, ეს ტერიტორია დემილიტარიზებული იქნება და „ჰამასი“ განიარაღებული იქნება — ან მარტივი გზით, ან რთული გზით. ეს არის ის, რაც მე ვთქვი და ეს არის ის, რაც პრეზიდენტმა ტრამპმაც თქვა“, - განაცხადა ნეთანიაჰუმ. 

„ჩვენი წინააღმდეგობა პალესტინის სახელმწიფოს შექმნის მიმართ იორდანეს დასავლეთით ნებისმიერ ადგილას არსებობს, მტკიცეა და საერთოდ არ შეცვლილა. ათწლეულების განმავლობაში ვეწინააღმდეგებოდი ამ მცდელობებს და ამას ვაკეთებ როგორც გარე, ასევე შიდა ზეწოლის წინააღმდეგ. არავისგან არ მჭირდება გამხნევება, ტვიტები, ან ლექციები“, - დასძინა მან. 

ინფორმაციისთვის, გაეროს უშიშროების საბჭო ხვალ კენჭს უყრის რეზოლუციას, რომელიც მხარს დაუჭერს აშშ-ის პრეზიდენტ დონალდ ტრამპის ღაზაში ცეცხლის შეწყვეტის ყოვლისმომცველ გეგმას. აღნიშნული გეგმა ასევე ითვალისწინებს პალესტინის სახელმწიფოს შექმნის პოტენციურ გზას.