ისრაელს „მეტი მიზანი აქვს შესასრულებელი“, - განაცხადა ისრაელის პრემიერ-მინისტრმა ბენიამინ ნეთანიაჰუმ ვიდეომიმართვაში მას შემდეგ, რაც აშშ-მა და ირანმა ორკვირიან ცეცხლის შეწყვეტის შეთანხმებას მიაღწიეს.  

„ჩვენ მათ [მიზნებს] მივაღწევთ ან შეთანხმებით, ან განახლებული ბრძოლით“, - აღნიშნა ნეთანიაჰუმ.

მისი თქმით, ისრაელი „მზადაა, ნებისმიერ დროს დაუბრუნდეს ბრძოლას“.

„თითი სასხლეტზეა“, - განაცხადა მან. 

ამასთან, ისრაელის პრემიერ-მინისტრმა აღნიშნა, რომ აშშ-სა და ირანს შორის „დროებითი ცეცხლის შეწყვეტა“ „ისრაელთან სრული კოორდინაციით“ შედგა.

მან ხაზგასმით აღნიშნა, რომ „ეს კამპანიის დასასრული არ არის. ეს კამპანიის ყველა მიზნის მიღწევის ერთ-ერთი ეტაპია“.

ნეთანიაჰუს თქმით, ირანი აშშ-სთან მოლაპარაკებებს მაშინ იწყებს, როდესაც ის უფრო სუსტია, ვიდრე ოდესმე და ჰორმუზის სრუტეს მას შემდეგ ხსნის, რაც უარს ამბობს ყველა მოთხოვნაზე - სანქციების მოხსნაზე, რეპარაციებზე, ომის სამუდამოდ დასრულებასა და ლიბანში ცეცხლის შეწყვეტაზე.