ისრაელის პრემიერ-მინისტრი ბენიამინ ნეთანიაჰუ მიესალმა აშშ-ში წარმოებული თანამედროვე ავიაგამანადგურებლების ორი ახალი ესკადრილიის დაგეგმილ შეძენას და განაცხადა, რომ ეს „გააძლიერებს ისრაელის აბსოლუტურ საჰაერო უპირატესობას“.

ისრაელის თავდაცვის სამინისტრომ გამოაცხადა F-35I და F-15IA ავიაგამანადგურებლების ესკადრილიის შეძენის გეგმები, რაც თავდაცვის მომავალი ბიუჯეტის მასიური ზრდის ფარგლებში იგეგმება.

ვიდეომიმართვაში ნეთანიაჰუმ განაცხადა, რომ ისრაელი მომდევნო ათწლეულის განმავლობაში თავდაცვის ბიუჯეტს 350 მილიარდ შეკელს (დაახლოებით 118 მილიარდ დოლარს) დაამატებს, რადგან ქვეყანას იარაღის უცხოელი მწარმოებლებისგან დამოუკიდებლობის მოპოვება სურს. მან ასევე განაცხადა, რომ ისრაელი შეიმუშავებს საკუთარ „რევოლუციურ, ისრაელში წარმოებულ თვითმფრინავს“.

ნეთანიაჰუ ასევე შეეხო დრონების საფრთხეს, რომლის წინაშეც მისი ქვეყანა სამხრეთ ლიბანსა და ჩრდილოეთ ისრაელში აღმოჩნდა. მან დრონების წინააღმდეგ საბრძოლველად „სპეციალური პროექტის“ განხორციელება ბრძანა, თუმცა აღნიშნა, რომ ეს საკითხი სწრაფად ვერ მოგვარდება. 

„ამას დრო დასჭირდება, მაგრამ ჩვენ ამაზე ვმუშაობთ“, - განაცხადა ნეთანიაჰუმ.