ჩრდილოატლანტიკური ალიანსი აცხადებს, რომ უკრაინის მომავალ წევრობასთან დაკავშირებით ნატოს პოლიტიკაში ცვლილებები არ მომხდარა. ამის შესახებ ალიანსის ოფიციალურმა წარმომადგენელმა ბრიუსელში ჟურნალისტებს ანონიმურობის დაცვით განუცხადა. 

ოფიციალური პირის თქმით, აშშ-ის ხელმძღვანელობის ბოლო განცხადებების მიუხედავად, ნატოს არ სჯერა, რომ მისი პოზიცია უკრაინის გაწევრიანებასთან დაკავშირებით შეიცვალა.

„ჩვენს ურთიერთობებში არაფერი შეცვლილა. ჩვენი ურთიერთობები რჩება მტკიცე, გვაქვს ძლიერი პოლიტიკური კავშირები და პრაქტიკული თანამშრომლობა ბევრ სფეროში“, - აცხადებენ ალიანსში.

ამასთან, მისივე თქმით, უკრაინასთან მიმართებით ადრე მიღებულ პოლიტიკაში ცვლილებები არ მომხდარა.

„მოკავშირეებმა ვაშინგტონში გამართულ სამიტზე განაცხადეს, რომ უკრაინის გზა ნატოსკენ შეუქცევადია. ეს გადაწყვეტილება ძალაში რჩება, ის ნატოს ზოგად პოლიტიკად რჩება. ჩვენთვის უკრაინის უფლება, აირჩიოს თავისი ალიანსები და განსაზღვროს თავისი საგარეო პოლიტიკური გზა ახლა ისეთივე მნიშვნელოვანია, როგორც ყოველთვის იყო“, - აღნიშნეს ალიანსის სამდივნოში.

შტაბ-ბინაში ასევე აღნიშნავენ, რომ პრინციპული პოზიცია სახელმწიფოს უფლებასთან დაკავშირებით, აირჩიოს ნატოსთან ურთიერთობის მისწრაფებების დონე, ეხება არა მხოლოდ უკრაინას, არამედ ყველა სახელმწიფოს, რადგან ეს მსოფლიო პოლიტიკის საფუძვლების ნაწილია.