ნატოს გენერალური მდივანი მარკ რუტე მიიჩნევს, რომ ვლადიმერ პუტინისა და რუსეთის მიერ გაჟღერებული „გიჟური განცხადებები“ უკრაინასთან სამშვიდობო შეთანხმების შესახებ ზედმეტად სერიოზულად არ უნდა მიიღონ, რადგან ეს რუსეთისთვის დამახასიათებელი მოლაპარაკების წარმართვის მეთოდია. ამის შესახებ რუტემ 2 აპრილს ბრიუსელში გამართულ პრესკონფერენციაზე განაცხადა.

ნატოს გენერალურმა მდივანმა ხაზგასმით აღნიშნა, რომ პუტინისა და რუსეთის განცხადებები უკრაინაში ომის მშვიდობიანი დარეგულირების შესახებ სერიოზულად არ უნდა მიიღონ, მაგრამ მათ ყურადღება უნდა მიექცეს და შესაბამისი რეაგირებაც უნდა მოჰყვეს.

„თქვენ მოისმენთ უამრავ გიჟურ რაღაცას, რომელიც პუტინიდან და რუსეთიდან მოდის, მათ შორის მათი მოთხოვნები სამშვიდობო შეთანხმების შესახებ და მსგავსი რამ. ამ ყველაფერს ზედმეტად სერიოზულად არ მივიღებდი. თუმცა, რა თქმა უნდა, ჩვენ ყოველთვის უნდა მივაქციოთ ამას ყურადღება და რეაგირება მოვახდინოთ“, - განაცხადა მარკ რუტემ.

მისივე განმარტებით, გულისხმობს იმას, რომ „ეს ასევე ის მეთოდია, რომლითაც ის [პუტინი] მოლაპარაკებების წარმოებას ცდილობს“.

„მივესალმები პრეზიდენტ ტრამპს ჩიხიდან გამოსვლისთვის, დისკუსიის დაწყებისთვის, ენერგეტიკულ ინფრასტრუქტურაზე ცეცხლის 30-დღიანი შეწყვეტისთვის, შავი ზღვის საკითხზე გადადგმული ნაბიჯებისთვის. რა თქმა უნდა, მეტის იმედი გვაქვს. ვიცი, რომ ამერიკის ადმინისტრაცია ამაზე დღე და ღამე მუშაობს“, - აღნიშნა ნატოს გენმდივანმა.

მან ასევე დასძინა, რომ „ევროპული მხარისთვის მნიშვნელოვანია, რომ ქვეყნებმა, როგორებიცაა დიდი ბრიტანეთი და საფრანგეთი, იფიქრონ ცეცხლის შეწყვეტის შემდეგ არსებულ ვითარებაზე, სამშვიდობო შეთანხმებაზე“.

„კომენტარს გავაკეთებდი პუტინის ყველა განცხადებაზე, რომელსაც მედიაში აკეთებს, განსაკუთრებით მაშინ, როდესაც საქმე ეხება იმას, თუ რას ცდილობენ ამერიკელები ცეცხლის შეწყვეტისა და სამშვიდობო შეთანხმების თვალსაზრისით - მაგრამ ეს არ გამოგვადგება. თუმცა, მოსკოვიდან ბევრ უცნაურ რამეს მოისმენთ“, - დაასკვნა მარკ რუტემ.