რუსეთის ხელისუფლების განაცხადებით, მოსკოვის ოლქზე უკრაინული დრონით განხორციელებული იერიშის შედეგად ორი ადამიანი დაიღუპა. ამავე ცნობით, დარტყმა განხორციელდა რეგიონში მდებარე ნავთობგადამამუშავებელ ქარხანაზე.

უკრაინის პრეზიდენტმა ვოლოდიმირ ზელენსკიმ განაცხადა, რომ დარტყმას „ძალიან მნიშვნელოვანი გავლენა“ ჰქონდა და აღნიშნა, რომ დაზიანებული ნავთობგადამამუშავებელი ქარხნიდან მიღებული შემოსავლები „ომის მანქანას მილიარდობით დოლარით აფინანსებს“.

„მოსკოვმა უნდა დაასრულოს თავისი სასტიკი ომი და მშვიდობა აირჩიოს, ნაცვლად იმისა, რომ სხვა რეგიონების ხარჯზე საჰაერო თავდაცვის მრავალშრიანი რგოლები შექმნას“, — დაწერა ზელენსკიმ X-ზე.

მოსკოვის მერის სერგეი სობიანინის განცხადებით, 19 სექტემბრიდან მოყოლებული რუსეთმა 1 600-ზე მეტი დრონი ჩამოაგდო, მათგან 450 რუსეთის დედაქალაქისკენ იყო მიმართული. ეს არის ქალაქზე უკრაინული დრონებით განხორციელებული ერთ-ერთი ყველაზე მასშტაბური იერიში მას შემდეგ, რაც რუსეთმა 2022 წელს უკრაინაში სრულმასშტაბიანი ომი დაიწყო.

სობიანინმა განაცხადა, რომ ნავთობგადამამუშავებელ ქარხანამდე მრავალმა დრონმა მიაღწია, ერთი კი საცხოვრებელ სახლს მოხვდა. ქარხნისთვის მიყენებული ზიანის მასშტაბი ჯერჯერობით უცნობია.

მოსკოვის მერის თქმით, თავდასხმა რუსეთის საპარლამენტო არჩევნების ჩაშლის მიზნით დაიგეგმა.