უკრაინულმა დრონებმა შეუტიეს რუსულ პოლიგონს, საიდანაც რუსები „ორეშნიკის“ რაკეტებს ისვრიან. დარტყმის სამიზნე გახდა ობიექტი, რომელიც 8 იანვარს ლვოვის გარეუბანზე თავდასხმებისთვის გამოიყენეს. ამის შესახებ ინფორმაციას RBC-Ukraine გამოცემა Militarnyi-ზე დაყრდნობით ავრცელებს.

უკრაინულმა დრონებმა ასტრახანის რეგიონში, მე-4 სახელმწიფო ცენტრალურ სპეციალობათაშორის საწვრთნელ პოლიგონზე - „კაპუსტინ იარზე“ თავდასხმა განახორციელეს. პოლიგონი აქტიურად გამოიყენება „ორეშნიკის“ საშუალო რადიუსის ბალისტიკური რაკეტების გამოსაცდელად. 

რუსული Telegram არხის Radar VRV-ის ცნობით, თავდასხმის დროს საცდელ მოედანზე საჰაერო თავდაცვა ფუნქციონირებდა, თუმცა მოიერიშე დრონებმა ასაწყობი და საცდელი შენობა დაბომბეს.

„ორეშნიკის“ გარდა, პოლიგონზე ასევე გამოიცდება სხვადასხვა მოკლე და საშუალო რადიუსის რაკეტები, ფრთოსანი რაკეტები, საჰაერო თავდაცვის სისტემები და S-400 გამშვები სისტემები.

„კაპუსტინ იარზე“ უკრაინული დრონებით წინა თავდასხმა 2024 წლის ივლისში მოხდა, როდესაც ობიექტის ტერიტორიაზე მდებარე შენობები დაზიანდა.