გერმანიის კანცლერმა ფრიდრიხ მერცმა 3 მარტს თეთრ სახლში აშშ-ის პრეზიდენტ დონალდ ტრამპთან შეხვედრის შემდეგ განაცხადა, რომ უკრაინის შესახებ ნებისმიერი შეთანხმება, რომელიც ევროპული ქვეყნების მონაწილეობის გარეშე იქნება დადებული, მიუღებელია.

როგორც მერცმა შეხვედრის შემდეგ გამართულ ბრიფინგზე განაცხადა, ევროპა რუსეთსა და უკრაინას შორის სამშვიდობო მოლაპარაკებებში უნდა იყოს ჩართული, რადგან მხოლოდ ევროპის მონაწილეობით შეიძლება იყოს მშვიდობა მდგრადი და ლეგიტიმური.

„ევროპელების მონაწილეობის გარეშე შეთანხმება არ იქნება“, - ხაზგასმით აღნიშნა კანცლერმა.

მერცმა ასევე ხაზი გაუსვა მოსკოვზე ზეწოლის გაზრდის აუცილებლობას: „რუსეთი დროს აჭიანურებს და ამით აშშ-ის პრეზიდენტის სურვილის საწინააღმდეგოდ მოქმედებს. დღეს მე მოსკოვზე ზეწოლის გაზრდისკენ მოვუწოდე“.

მან დასძინა, რომ ევროპის წვლილი უკრაინის უსაფრთხოებაში, რეკონსტრუქციასა და ევროპულ ინტეგრაციაში აუცილებელია სტაბილური მშვიდობისთვის.

„ტრამპმა იცის, რომ მხოლოდ მშვიდობა, რომელსაც მხარს უჭერს და ლეგიტიმაციას ანიჭებს ევროპა, შეიძლება იყოს მართლაც გრძელვადიანი. მან ასევე იცის, რომ ევროპის წვლილი უკრაინის უსაფრთხოებაში, რეკონსტრუქციასა და ევროპულ ინტეგრაციაში შეუცვლელი იქნება ამ მშვიდობისთვის“, - აღნიშნა მერცმა.