მერცი ტრამპს: დიდ სახელმწიფოებს არ შეუძლიათ ომების დასრულება მეომარი ქვეყნების ჩართულობის გარეშე
გერმანიის კანცლერმა ფრიდრიხ მერცმა აშშ-ის პრეზიდენტი დონალდ ტრამპი გააფრთხილა, რომ არ ეცადოს უკრაინაში ომის დასრულებას კიევის, ან ევროპელების თანხმობის გარეშე.
„დიდ სახელმწიფოებს არ შეუძლიათ ომების დასრულება მეომარი ქვეყნების ჩართულობის გარეშე“, - განაცხადა მერცმა იოჰანესბურგში G20-ის სამიტის ფარგლებში.
მისი თქმით, საჭიროა როგორც უკრაინის, ასევე ევროპელების თანხმობა.
„რადგან ეს ომი ევროპის კონტინენტზეა და იმისდა მიხედვით, თუ როგორ დასრულდება ეს ომი, მას შედეგები მოჰყვება ევროპის უსაფრთხოებისთვის“, - ხაზგასმით აღნიშნა მერცმა.
მან დაადასტურა ინფორმაცია, რომ ხვალ, 23 ნოემბერს, ჟენევაში გერმანიის, საფრანგეთის, დიდი ბრიტანეთისა და სხვა ევროპული ქვეყნების უსაფრთხოების პოლიტიკის მრჩევლები შეუერთდებიან თავიანთ კოლეგებს უკრაინიდან და შეერთებული შტატებიდან.
