ევროპისთვის „ამერიკული მშვიდობის“ ათწლეულები დიდწილად დასრულდა, - ამის შესახებ გერმანიის კანცლერმა ფრიდრიხ მერცმა მიუნხენში გამართულ კონფერენციაზე განაცხადა.

როგორც გერმანიის კანცლერმა აღნიშნა, ევროპელები უნდა მოემზადონ ტრანსატლანტიკურ ურთიერთობებში ფუნდამენტური ცვლილებებისთვის.

„პოლიტიკა სურვილების სია არ არის. ტრამპი ერთ დღეში არ მოსულა და ეს ამერიკული პოლიტიკა ერთ ღამეში არ გაქრება. შესაძლოა, შემდეგი პრეზიდენტის დროს ყველაფერი კიდევ უფრო გართულდეს. მოდით, შევამზადოთ საკუთარი თავები იმ ფაქტისთვის, რომ ტრანსატლანტიკურ ურთიერთობებშიც ფუნდამენტურ ცვლილებებს ვხედავთ.

ძვირფასო მეგობრებო, ჩვენთვის, ევროპისთვის, ასევე გერმანიაში, „ამერიკული მშვიდობის“ ათწლეულები დიდწილად დასრულდა. ის აღარ არსებობს იმ ფორმით, როგორიც ვიცოდით და ნოსტალგია აქ ვერაფერში გვეხმარება. ფაქტია, ამერიკელები ახლა ძალიან, ძალიან გადამწყვეტად მისდევენ საკუთარ ინტერესებს და ამაზე ჩვენი ერთადერთი პასუხი შეიძლება, იყოს ჩვენივე ინტერესების დაცვა“, - აღნიშნა ფრიდრიხ მერცმა.

ამასთან, უკრაინაში მიმდინარე ომზე საუბრისას, გერმანიის კანცლერმა განაცხადა, რომ უკრაინა თუ დაეცემა, პუტინი არ გაჩერდება.