იტალიის პრემიერ-მინისტრმა ჯორჯია მელონიმ განაცხადა, რომ მან აშშ-ის პრეზიდენტ დონალდ ტრამპს თხოვნით მიმართა, შეცვალოს მისი „მშვიდობის საბჭოს“ „კონფიგურაცია“, რათა რომმა ინიციატივაში ჩართვა შეძლოს.

რომში გერმანიის კანცლერ ფრიდრიხ მერცთან ერთად გამართულ პრესკონფერენციაზე მელონიმ განაცხადა, რომ იტალია „მშვიდობის საბჭოში“ გაწევრიანებით დაინტერესებულია, თუმცა მას არ შეუძლია შეერთება გარკვეული ასპექტების გამო, რომლებიც ქვეყნის კონსტიტუციას ეწინააღმდეგება.

პრემიერ-მინისტრის თქმით, მან ეს შეშფოთება აშშ-ის პრეზიდენტს გაუზიარა.

„ვფიქრობ, ჩვენთვის ინიციატივის სტრუქტურირებასთან დაკავშირებით ობიექტური კონსტიტუციური პრობლემები არსებობს და მას ვთხოვე, მზად იყოს ამ კონფიგურაციის გადახედვისთვის, რათა დააკმაყოფილოს არა მხოლოდ იტალიის, არამედ სხვა ევროპული ქვეყნების საჭიროებებიც“, - განუცხადა მელონიმ ჟურნალისტებს.

იტალიის კონსტიტუციის თანახმად, ქვეყანას შეუძლია, შეუერთდეს საერთაშორისო ორგანიზაციებს, რომლებიც უზრუნველყოფენ „ხალხებს შორის მშვიდობასა და სამართლიანობას“, მხოლოდ „სხვა სახელმწიფოებთან თანასწორი პირობებით“, რაც შეუთავსებელია აშშ-ის პრეზიდენტის უზენაესობასთან „მშვიდობის საბჭოში“.

იტალიის მთავრობის მეთაურის პოზიცია გერმანიის კანცლერმაც გაიზიარა. 

„რაც შეეხება „მშვიდობის საბჭოს“, პირადად მე მზად ვიქნები, შევუერთდე მას, თუ ის ღაზაში მიმდინარე პროცესს დააკვირდება. თუმცა, ნებისმიერ შემთხვევაში, ჩვენ არ შეგვიძლია მივიღოთ მმართველობის ამჟამინდელი  სტრუქტურები“, - განაცხადა მერცმა.