საბერძნეთში მარტოხელა კაცებს და ერთნაირსქესიანი კაცების წყვილებს სუროგატული დედებისგან ბავშვის გაჩენა აეკრძალებათ. ამის შესახებ Associated Press იუწყება.

შესაბამისი განცხადება საბერძნეთის იუსტიციის მინისტრმა გიორგოს ფლორიდისმა გააკეთა. მთავრობა ამ წინადადებებს პარლამენტს გადაუგზავნის, რაც სამოქალაქო კოდექსის უფრო ფართო ცვლილების ფარგლებში მოხდება.

„ორსულობის შესაძლებლობის არქონა გენდერულ კუთვნილებაზე არ არის დამოკიდებული. ანუ ქალს შეიძლება ეს ფუნქცია არ ჰქონდეს იმისდა მიუხედავად, არის ის წყვილში კაცთან, იგივე სქესის პარტნიორი ჰყავს თუ მარტოხელა ქალია“, - განაცხადა მინისტრმა.

საბერძნეთის იუსტიციის სამინისტროს განცხადებით, სქესობრივი კუთვნილების გამო ორსულობის შეუძლებლობა არ არის სამედიცინო უნაყოფობა, ეს ცვლილება ასევე მიმართულია ადამიანთა ვაჭრობის წინააღმდეგ, რაც ბოლო დროს ძალზე აქტუალური გახდა.

ცნობისთვის, გასულ წელს საბერძნეთში ერთნაირსქესიანთა ქორწინებები იყო ლეგალიზებული. საბერძნეთში მოსახლეობის უმეტესობა მართლმადიდებელი ქრისტიანია. საბერძნეთი პირველი გახდა ასეთ ქვეყნებს შორის, სადაც ერთსქესიანთა ქორწინება დააკანონეს.