აშშ-ის სახელმწიფო მდივანმა მარკო რუბიომ გააკრიტიკა ამჟამინდელი საერთაშორისო სისტემა და განაცხადა, რომ ვაშინგტონი მუდმივად თავის ეროვნულ ინტერესებს საერთაშორისო წესრიგზე მაღლა დააყენებს.

გაეროს გენერალური ასამბლეის კულუარებში ჟურნალისტებთან საუბრისას რუბიომ აღნიშნა, რომ ორგანოებმა დაკარგეს ძირითადი დანიშნულება და ვერ შეძლეს გლობალური ძირითადი კონფლიქტების მოგვარება.

„საერთაშორისო სისტემა ამჟამად კარგ მდგომარეობაში არ არის,  ისევე, როგორც ეს საერთაშორისო ნორმები, რომლებზეც ხშირად ლაპარაკობენ. საბოლოო ჯამში, პრეზიდენტი [დონალდ ტრამპი] და მე ამას თავიდანვე ვუსვამდით ხაზს: ამ ადმინისტრაციის პოზიციით, ნებისმიერი მთავრობის უპირველესი და მთავარი მოვალეობა საკუთარი ქვეყნის ეროვნული ინტერესების დაცვაა“, - აცხადებს რუბიო. 

რუბიომ აღნიშნა, რომ მსოფლიო ლიდერები სულ უფრო მეტად იზიარებენ კონსენსუსს, რომ გლობალური ინსტიტუტები აღარ მუშაობენ ისე, როგორც დაგეგმილი იყო.

„მრავალი ლიდერი მიუთითებს იმ ფაქტზე, რომ საერთაშორისო სისტემა კრახს განიცდის და ის კრახს განიცდის იმიტომ, რომ ის თავისი მანდატის ფარგლებს გასცდა. სისტემა ჩაერია ისეთ საკითხებში, სადაც არ უნდა ჩარეულიყო და ამავდროულად, უუნარო აღმოჩნდა მსოფლიოში არსებული თითქმის ყველა მასშტაბური კონფლიქტის გადასაჭრელად“, - განაცხადა აშშ-ის სახელმწიფო მდივანმა.