„რუსეთის საფრთხე ნატოს ქვეყნებისთვის მრავალი წლის განმავლობაში იარსებებს, უკრაინასთან სამშვიდობო შეთანხმების შემდეგაც კი,“ - ამის შესახებ ნატოს გენერალურმა მდივანმა, მარკ რუტემ ბრიუსელში  ჩრდილოატლანტიკური საბჭოს შეხვედრის დაწყებამდე განაცხადა.

რუტემ ხაზგასმით აღნიშნა, რომ ალიანსმა უნდა დაგეგმოს, როგორ დაიცვას თავისი ტერიტორია რუსეთისგან, რადგან მისი საფრთხე არ გაქრება უკრაინასთან სამშვიდობო შეთანხმების შემდეგაც კი. 

„2032 წლისთვის აქცენტი არის ის, თუ როგორ დავიცვათ ნატოს ტერიტორია რუსებისგან, ჩვენი გრძელვადიანი საფრთხისგან, რომელიც დარჩება მას შემდეგაც, რაც, იმედი მაქვს, უკრაინაზე შეთანხმება იქნება მიღწეული. რუსული საფრთხე კიდევ მრავალი წლის განმავლობაში იარსებებს“, - განაცხადა მარკ რუტემ.

ნატოს გენერალურმა მდივანმა დაადასტურა, რომ შეერთებული შტატები რჩება საიმედო მოკავშირედ ალიანსში.

„თქვენ ნახეთ, რა თქვა თავად პრეზიდენტმა ტრამპმა მე-5 მუხლზე, ნატოზე, მის სრულ ერთგულებაზე“, - აცხადებს რუტე.