საფრანგეთის პრეზიდენტმა ემანუელ მაკრონმა აშშ-ის პრეზიდენტის დონალდ ტრამპის მიერ მსოფლიოს ქვეყნების უმრავლესობის იმპორტზე დაწესებულ ტარიფებს „სასტიკი და უსაფუძვლო“ უწოდა და აღნიშნა, რომ ისინი ამერიკელების კეთილდღეობას დააზარალებს.

მაკრონმა ფრანგ ექსპორტიორებთან შეხვედრაზე სიტყვით გამოსვლისას განაცხადა, რომ ტრამპის ტარიფები იქნება „შოკი საერთაშორისო ვაჭრობისთვის“ და დიდ გავლენას მოახდენს ევროპის ეკონომიკაზე.

„სავაჭრო დეფიციტი ტარიფებით არ გამოსწორდება. ერთი რამ ცხადია: ამაღამ მიღებული გადაწყვეტილებებით, ამერიკული ეკონომიკა და ამერიკელები, ბიზნესებიც და მოქალაქეებიც, უფრო სუსტები და ღარიბები გახდებიან, ვიდრე აქამდე იყვნენ”, - განაცხადა ემანუელ მაკრონმა.

ამასთან, Bloomberg-ის ცნობით, საფრანგეთის პრეზიდენტმა ევროკავშირის კომპანიებს მოუწოდა, შეაჩერონ ინვესტიციები შეერთებულ შტატებში.

მაკრონის თქმით, აზრი არ აქვს ფირმების ინვესტირებას იქ, სანამ აშშ ევროპას უტევს.

როგორც The Guardian-ი იტყობინება, მაკრონმა ასევე აღნიშნა, რომ ეთანხმება ევროკავშირის ლიდერებს, რომ ტრამპის ქმედებების საპასუხოდ „არაფერია გამორიცხული“, რადგან „ყველა ინსტრუმენტი მაგიდაზეა“.

არსებულ ინსტრუმენტებს შორის მან მიუთითა ციფრული სერვისების სექტორში პოტენციურ ჩარევაზე, „სადაც შეერთებული შტატები ევროპისგან უზარმაზარ სარგებელს იღებს“.

მაკრონმა ასევე მოუწოდა ლიდერებს, დარჩნენ ერთიანები, წინააღმდეგობა გაუწიონ ცდუნებას, „მარტო იმოქმედონ“ და გამოიყენონ ევროპული ბაზრის ზომა ნებისმიერი პოლიტიკის საპასუხოდ. 

შეგახსენებთ, დონალდ ტრამპის მიერ სხვადასხვა ქვეყნისთვის დაწესებული ტარიფები 10%-იდან 49%-მდეა. ტრამპმა ევროკავშირს - 20%-იანი და დიდ ბრიტანეთს 10%-იანი ტარიფები დაუწესა.