საფრანგეთის პრეზიდენტი ემანუელ მაკრონი მიიჩნევს, რომ თუ კრემლის ლიდერი კვლავაც თავს არიდებს უკრაინის პრეზიდენტთან შეხვედრას, რაზეც ის ტრამპთან სამიტის დროს დათანხმდა, ეს ისეთი რამაა, რასაც ამერიკის პრეზიდენტი რეაგირების გარეშე ვერ დატოვებს.

მაკრონმა გაიხსენა, რომ ალასკის სამიტის დროს, პუტინმა ტრამპს უთხრა, რომ ზელენსკისთან შეხვედრაზე თანახმა იყო, რის შემდეგაც მოსკოვმა დაიწყო მიზეზების მოგონება, თუ რატომ არ არიან ჯერ მზად ამისთვის.

მაკრონმა აღნიშნა, რომ თუ შეხვედრაზე ორშაბათამდე, 1-ელ სექტემბრამდე შეთანხმება არ იქნება მიღწეული, „ეს ნიშნავს, რომ პრეზიდენტმა პუტინმა პრეზიდენტი ტრამპი მოატყუა [...] და ეს უპასუხოდ არ უნდა დარჩეს“.

„ჩვენ ორივე ვესაუბრებით პრეზიდენტ ტრამპს... და თუ მომავალ კვირაში მოგვიწევს იმის დაფიქსირება, რომ თვეების განმავლობაში შეუსრულებელი დაპირებების შემდეგ კიდევ ერთხელ არაფერი მოხდა, ჩვენ ძალიან მკაფიოდ მოვუწოდებთ პირველადი და მეორადი სანქციების დაწესებისკენ“, - დასძინა მაკრონმა.