საფრანგეთის პრეზიდენტმა ემანუელ მაკრონმა ისრაელ-ირანს შორის ცეცხლის შეწყვეტა და ღაზაში ომი პრემიერ-მინისტრ ბენიამინ ნეთანიაჰუსთან ტელეფონით განიხილა, - ამის შესახებ მაკრონი X-ზე გამოქვეყნებულ პოსტში წერს.

მაკრონი წერს, რომ სატელეფონო საუბრის დროს მან „ხაზი გაუსვა ყველა მხარის მიერ მიმდინარე ზავის პატივისცემის მნიშვნელობას“.

როგორც მაკრონი აცხადებს, ისრაელის პრემიერ-მინისტრს ირანთან ცეცხლის შეწყვეტის შეთანხმების დაცვის მნიშვნელობაზე ესაუბრა.

„საფრანგეთსა და ისრაელს ერთი და იგივე მიზანი აქვთ: ირანმა არასდროს არ უნდა შექმნას ბირთვული იარაღი“, - წერს მაკრონი.

როგორც საფრანგეთის პრეზიდენტი  წერს, საუბრისას ხაზი გავუსვა, დროთა განმავლობაში მოლაპარაკებების მაგიდასთან დაბრუნების აუცილებლობას - როგორც ბირთვულ, ასევე, ბალისტიკურ საკითხებზე.

„ ხაზი გავუსვი, დროთა განმავლობაში მოლაპარაკებების მაგიდასთან დაბრუნების აუცილებლობას - როგორც ბირთვულ, ასევე ბალისტიკურ საკითხებზე. ეს აუცილებელია როგორც ისრაელის უსაფრთხოებისთვის, ასევე რეგიონში ყველასთვის“,- განაცხადა მაკრონმა.

საფრანგეთის პრეზიდენტის თქმით, ნეთანიაჰუს, ასევე, ღაზაში არსებულ ვითარებაზეც ესაუბრა.

„კიდევ ერთხელ გავუმეორე ისრაელის პრემიერ-მინისტრს, რომ ღაზაში ცეცხლის შეწყვეტა აუცილებელია. ყველა მძევლის გათავისუფლება, ღაზის სექტორში ჰუმანიტარული დახმარების ფართომასშტაბიანი ხელმისაწვდომობა და ორი სახელმწიფოს პრინციპზე დაფუძნებული გზის ძიება კვლავ მთავარ პრიორიტეტებად რჩება“, - წერს მაკრონი.

I just spoke with Prime Minister @Netanyahu.

I emphasized the importance of all parties respecting the current truce.

We share the same objective: that Iran must never acquire nuclear weapons. To ensure this over time, I stressed the need to return to…

— Emmanuel Macron (@EmmanuelMacron) June 25, 2025