ლიეტუვის საგარეო საქმეთა მინისტრმა კესტუტის ბუდრისმა გააკრიტიკა ბუდაპეშტის წინადადება რუსულ ნავთობზე სანქციების მოხსნის შესახებ, ახლო აღმოსავლეთში ომის შედეგად გლობალურ ბაზარზე შექმნილი ვითარების გამო.

ლიეტუვის საგარეო საქმეთა მინისტრმა ევროკავშირს მოუწოდა, საწვავის ფასების ამ გზით შემცირების ცდუნებას წინააღმდეგობა გაუწიოს.

„ევროპის მიერ რუსეთისგან გრძელვადიანი დამოუკიდებლობისთვის მიღებულ გადაწყვეტილებებზე როდესაც ვსაუბრობთ, ჩვენ არ შეგვიძლია გადაწყვეტილებების გადახედვა მხოლოდ იმიტომ, რომ მოკლევადიან პერსპექტივაში შოკის წინაშე ვდგავართ“, - ხაზგასმით აღნიშნა ლიეტუვის საგარეო საქმეთა მინისტრმა.

მან გაიხსენა, რომ ევროპამ მაღალი ფასებით გამოწვეული რთული პერიოდი უკვე წარმატებით გადაიტანა.

„გაიხსენეთ ელექტროენერგიის ფასები ლიეტუვაში რამდენიმე წლის წინ. ჩვენ ამას გადავურჩით. ევროპა ამას ახლაც ისევე გადაიტანს. ყველაფერი მხოლოდ დღევანდელ ხარჯებზე არ უნდა დავიყვანოთ – ეს სტრატეგიული მოკლევადიანი ხედვაა“, - აღნიშნა კესტუტის ბუდრისმა.