ლიეტუვის საგარეო საქმეთა მინისტრი კესტუტის ბუდრისი მიიჩნევს, რომ უკრაინას შეეძლო კორუფციასთან უფრო სწრაფად და ეფექტურად ებრძოლა, თუ ევროკავშირში გაწევრიანების შესახებ მოლაპარაკებები მალე დაიწყებოდა. ამის შესახებ მან LRT-ს განუცხადა. 

ბუდრისის კომენტარი უკრაინის ენერგეტიკულ სექტორში მასშტაბური კორუფციული სკანდალის ფონზე გაკეთდა.

ის დარწმუნებულია, რომ ამჟამინდელი სიტუაცია უნდა გახდეს მიზეზი, რომ ევროპამ კიდევ უფრო მეტი დახმარება გაუწიოს უკრაინას, „რათა მსგავსი რამ აღარ მოხდეს“.

„ეს არის მიზეზი იმისა, რომ ვთქვათ... მოდით, რაც შეიძლება მალე დავიწყოთ [ევროკავშირში გაწევრიანებაზე] მოლაპარაკებები, რადგან ჩვენ შეგვიძლია, გამოვასწოროთ სიტუაცია, გავაძლიეროთ ინსტიტუტები, მოვიზიდოთ კომპეტენტური ადამიანები და, საბოლოო ჯამში, შევქმნათ სამართლებრივი ჩარჩო, რომელიც შეამცირებს კორუფციისთვის ხელსაყრელი ხვრელების დარჩენის ალბათობას“, - განაცხადა ლიეტუვის საგარეო საქმეთა მინისტრმა.

ბუდრისმა გაიხსენა, რომ ლიეტუვასაც მსგავსი პრობლემები შეექმნა ევროკავშირში გაწევრიანების შესახებ მოლაპარაკებების დროს.

„მოდით, გავიხსენოთ ევროკავშირში გაწევრიანების მთელი პროცესი, საზოგადოებაში არსებული პრობლემები, რომელთა გადაჭრაც მოგვიწია, კორუფციისა და არაეფექტურობის მასშტაბები სხვადასხვა სფეროში“, - განაცხადა ლიეტუველმა მინისტრმა.