ლიეტუვის პრეზიდენტმა გიტანას ნაუსედამ იმედი გამოთქვა, რომ ალიანსის სამიტზე, რომელიც მომავალ კვირას ანკარაში გაიმართება, ის აშშ-ის პრეზიდენტ დონალდ ტრამპისგან მოისმენს ნატოს კოლექტიური თავდაცვის პუნქტის მხარდაჭერის ცალსახა განცხადებას. ამის შესახებ ლიეტუვის პრეზიდენტმა LRT-თან ინტერვიუში განაცხადა.

ნაუსედამ აღნიშნა, რომ ტრამპის კრიტიკა იმის შესახებ, რომ ზოგიერთ მოკავშირეს კოლექტიური უსაფრთხოებისთვის ნაკლები წვლილი შეაქვს, უნდა იყოს აღქმული, როგორც მოწოდება ნატოს ყველა წევრისადმი, გაზარდონ თავდაცვის ხარჯები.

„ჩვენ ჯერ კიდევ ველოდებით ძალიან მკაფიო განცხადებას, რომ მე-5 მუხლი უდავო და წმინდაა. იმედი მაქვს, რომ ეს ანკარაში ამა თუ იმ ფორმით გაცხადდება“, - განაცხადა ნაუსედამ.

ლიეტუვის პრეზიდენტის აზრით, ტრამპი უბრალოდ შეშფოთებულია იმით, რომ „ყველა ქვეყანა ერთნაირად აცნობიერებდეს საკუთარ პასუხისმგებლობას და არ იყოს განხეთქილება მათ შორის, ვისაც უფრო მცირე წვლილი შეაქვს და მათ შორის, ვისაც უფრო დიდი წვლილი შეაქვს“.

ლიეტუვის ლიდერმა იმედი გამოთქვა, რომ სამიტი გააძლიერებს იმის გაგებას, რომ კოლექტიური თავდაცვა არა მხოლოდ რუსეთთან მოსაზღვრე ნატოს წევრების, არამედ მთლიანად ალიანსის საკითხია.

„თუ ეს გაგება ანკარაში შეხვედრის შემდეგ გაღრმავდება, სამიტს წარმატებულად ჩავთვლი“, - განაცხადა მან.

ნაუსედამ ასევე აღნიშნა, რომ ლიეტუვაში ამერიკული ჯარების სამომავლო ყოფნის საკითხი შესაძლოა, „უახლოეს კვირებში“ გადაწყდეს, თუმცა მას არ შეუძლია თქვას, ეს სამიტამდე მოხდება, თუ მის შემდეგ.

„ის სიგნალები, რომლებსაც ჩვენ ვიღებთ, პოზიტიურია, თუმცა ისინი ასევე მოითხოვს ცოტა მოთმინებას, რადგან ევროპაში ამერიკული ჯარების განლაგების უფრო ფართო სურათი ჯერ კიდევ ყალიბდება“, - დასძინა მან.