აშშ-ის სახელმწიფო მდივანმა მარკო რუბიომ ლიბანის პრეზიდენტ ჯოზეფ აუნთან სატელეფონო საუბარი გამართა მას შემდეგ, რაც ისრაელი და ლიბანური დაჯგუფება „ჰეზბოლა“ შეტაკებების შემდეგ ცეცხლის შეწყვეტაზე შეთანხმდნენ.

აშშ-ის სახელმწიფო დეპარტამენტის ცნობით, სატელეფონო საუბრის დროს რუბიომ „კიდევ ერთხელ დაადასტურა შეერთებული შტატების სრული მხარდაჭერა ლიბანის მთავრობის ძალისხმევის მიმართ, შექმნას სრულად სუვერენული ლიბანური სახელმწიფო, რომელიც ყველა მეზობლის მიმართ მშვიდობიანად იქნება განწყობილი“.

ლიბანის ლიდერის ოფისის ცნობით, აუნმა რუბიოს მხარდაჭერისთვის მადლობა გადაუხადა და ხაზი გაუსვა „ყოვლისმომცველი ცეცხლის შეწყვეტის“ აუცილებლობას, რათა ლიბანის ტერიტორიაზე ისრაელის თავდასხმები შეწყდეს. მან ეს პირობა ლიბანსა და ისრაელს შორის აშშ-ის შუამავლობით მიმდინარე მოლაპარაკებებში წინსვლის „ფუნდამენტურ საყრდენად“ შეაფასა.

„ეს მოლაპარაკებები მიზნად ისახავს იმ ძირითადი მიზნების მიღწევას, რისთვისაც ისინი დაიწყო: ლიბანის უსაფრთხოების, სტაბილურობის, სუვერენიტეტისა და ტერიტორიული მთლიანობის აღდგენას“, - ნათქვამია განცხადებაში.

რუბიომ დასძინა, რომ ორ მთავრობას შორის ორმხრივი მოლაპარაკებები „რეკონსტრუქციის, ეკონომიკური აღდგენისა და ძალადობის განმეორებითი ციკლების დასრულების ერთადერთი შესაძლო გზაა“.