ლიბანისა და ისრაელის დიპლომატების ვაშინგტონში მიმდინარე მოლაპარაკებების ფონზე, ლიბანის პრეზიდენტმა ჯოზეფ აუნმა განაცხადა, რომ ბეირუთი „სამხრეთ ლიბანში ისრაელის ოკუპაცია უნდა დასრულდეს“.

ლიბანის პრეზიდენტმა აღნიშნა, რომ ბოლო დღეების მოვლენებმა დაადასტურა მოლაპარაკებების გზის სისწორე.

„ბოლო დღეების განმავლობაში განვითარებულმა მოვლენებმა დაამტკიცა ჩვენი არჩევანის სისწორე, გავაგრძელოთ მოლაპარაკებები, რადგან ეს არის ერთადერთი საერთაშორისო დონეზე აღიარებული გზა ეროვნული მიზნების მისაღწევად და ყველა უფლების აღსადგენად“, - აღნიშნა ლიბანის პრეზიდენტმა. 

აუნი იმედოვნებს, რომ ისრაელთან მოლაპარაკებების ახალი რაუნდი „გადამწყვეტი“ იქნება იმ მიზნების მისაღწევად, რომლებიც, მისი თქმით, ლიბანისა და მისი ხალხის ინტერესებს ემსახურება. მათ შორისაა „ლიბანის სრული სუვერენიტეტი მისი ტერიტორიის ყოველი სანტიმეტრი“.

„დღეს ვაცხადებთ, რომ სამხრეთ ლიბანში ისრაელის ოკუპაციის დასრულებაზე ნაკლებს არ დავთანხმდებით“, - განაცხადა აუნმა.

მისი თქმით, ლიბანის ერთადერთი არჩევანი ეროვნული სუვერენიტეტია და ქვეყნის მომავალი მხოლოდ ლიბანის სახელმწიფოს უკავშირდება.

„ჩვენი ერთადერთი არჩევანი ეროვნული სუვერენიტეტია და ჩვენი ერთადერთი იმედი ლიბანის სახელმწიფოა, რომელიც ყველას დაიცავს, ყველას თავისუფლებასა და ღირსებას უზრუნველყოფს, პატივს სცემს გაღებულ მსხვერპლს და ათავისუფლებს ყველას შიშისა და უსამართლობისგან“, - დასძინა აუნმა.