დასავლური ქვეყნები იწყებენ იმის გაგებას, რომ უკრაინის მხოლოდ ნაწილი დარჩება, - ამის შესახებ რუსეთის საგარეო საქმეთა მინისტრმა სერგეი ლავროვმა ბელორუსის ახალგაზრდებთან შეხვედრაზე განაცხადა.

„როდესაც ჩვენი სპეციალური სამხედრო ოპერაცია დაიწყო, მათ დაიწყეს საუბარი: „უკრაინა ნატოში უნდა მიგვეღო, მაშინ რუსეთი მას თავს არ დაესხმებოდა“ ეს იყო მათი გზავნილი. ახლა კი სიტუაციის განვითარების ეს სცენარისტები იწყებენ იმის გაგებას, რომ უკრაინისგან მხოლოდ რაღაც ნაწილი დარჩება და ამბობენ: „მოდით, ახლავე გავჩერდეთ და მივიღოთ ეს ნაწილი ნატოში“. ხოლო სხვები ამბობენ: „არ შეიძლება გაჩერება, პუტინი უნდა დავასრულოთ, რადგან თუ ის არ დამთავრდება, ყველას თავს დაესხმება“, - აღნიშნა ლავროვმა.

რუსეთის საგარეო საქმეთა სამინისტროს ხელმძღვანელის თქმით, ეს ყველაფერი დასავლეთის მხრიდან „კონფრონტაციული ლოგიკაა“.

„შემდეგ მიიღება გადაწყვეტილებები, რომ უკრაინას კიდევ 10 მილიარდი მიეცეს, სამხედრო ბიუჯეტი გაიზარდოს“, - აღნიშნა მინისტრმა.