2025 წლის 23 ოქტომბერს გამართული ევროპული საბჭოს სხდომის შემდეგ ევროკავშირის წევრი სახელმწიფოების ლიდერებმა 2026-2027 წლებში უკრაინის ყველა ფინანსური საჭიროების დაკმაყოფილების ვალდებულება აიღეს. ამის შესახებ ევროპული საბჭოს პრეზიდენტმა ანტონიო კოშტამ ევროკავშირის ლიდერების სამიტის შემდეგ გამართულ პრესკონფერენციაზე განაცხადა.

კოშტას თქმით, რუსეთმა უნდა გააცნობიეროს, რომ უკრაინას მომდევნო ორი წლის განმავლობაში თავდაცვისთვის საჭირო საშუალებები ექნება.

„ევროკავშირის ლიდერებმა აიღეს ვალდებულება, რომ მომდევნო ორი წლის განმავლობაში უკრაინის ფინანსური საჭიროებების დაფარვას უზრუნველყოფენ“, - განაცხადა კოშტამ.

მან გაიხსენა, რომ 23 ოქტომბრის ევროპული საბჭოს დასკვნებში ევროკავშირის ლიდერებმა „მოუწოდეს ევროკომისიას, რაც შეიძლება მალე წარმოადგინოს ვარიანტები იმის უზრუნველსაყოფად, რომ უკრაინას ჰქონდეს საჭირო რესურსები, რათა გააგრძელოს საკუთარი თავის დაცვა და იბრძოლოს სამართლიანი და მდგრადი მშვიდობისთვის 2026 და 2027 წლებში, საჭიროების შემთხვევაში“.

„რუსეთმა ნათლად უნდა გაიგოს: უკრაინას ექნება თავდაცვისთვის საჭირო ფინანსური რესურსები“, - ხაზგასმით აღნიშნა კოშტამ.