გაერთიანებული სამეფოს პრემიერ-მინისტრი, კირ სტარმერი თეთრი სახლის ლიდერის, დონალდ ტრამპის მიერ დაწესებულ ტარიფებს გამოეხმაურა. სტარმერს The Guardian-ი ციტირებს.

სტარმერმა თქვა, რომ აშშ-ის პრეზიდენტის დონალდ ტრამპის მიერ გამოცხადებულ ტარიფებს „აშკარად“ ექნება ეკონომიკური გავლენა, მაგრამ დასძინა, რომ ბრიტანეთის მთავრობა მათ სიმშვიდით და ცივი გონებით უპასუხებს. 

მისი თქმით, მთავრობა ახლა ყურადღებას გაამახვილებს გადაწყვეტილების მიღებაზე „ჩვენი ეროვნული ინტერესების გათვალისწინებით“ და „მშრომელი ხალხის ჯიბეებში ფულის ჩადებაზე.“

„ეს მთავრობა ყველაფერს გააკეთებს ბრიტანეთის ეროვნული ინტერესების დასაცავად. ვიმოქმედებთ პრაგმატიზმით, სიმშვიდით და ცივი გონებით“, - აცხადებს სტარმერი. 

ინფორმაციისთვის, ტრამპმა აშშ-ში იმპორტირებულ თითქმის ყველა საქონელზე მინიმუმ, საბაზისო 10%-იან ტარიფი გამოაცხადა. ტრამპის გადაწყვეტილებით, 34%-იანი ტარიფი დაუწესდება ჩინეთს, ევროკავშირს - 20%-იანი, ვიეტნამს - 46%-იანი, ტაივანს - 32%-იანი, იაპონიას - 24%-იანი, ინდოეთს - 26%-იანი, სამხრეთ კორეას - 25%-იანი, ტაილანდს - 36%-იანი, შვეიცარიას - 31%-იანი, ინდონეზიას - 32%-იანი, მალაიზიას - 24%-იანი, დიდ ბრიტანეთს - 10%-იანი, ისრაელს - 17%-იანი, სამხრეთ აფრიკას - 30%-იანი.