უკრაინა და რუსეთი ცეცხლის სრულად შეწყვეტასთან ახლოს არიან, ამისთვის საჭიროა ორივე მხარის მიერ კომპრომისზე წასვლა. ამის შესახებ უკრაინაში აშშ-ის პრეზიდენტის დონალდ ტრამპის სპეციალურმა წარმომადგენელმა კიტ კელოგმა Fox Business-ს განუცხადა.

„ჩვენ გვინდა, მივაღწიოთ ყოვლისმომცველ 30-დღიან ცეცხლის შეწყვეტას. როგორც კი ამას მივაღწევთ, ძალიან რთული იქნება ომის განახლება. მე ასე მჯერა“, - აღნიშნა მან.

კელოგი მიიჩნევს, რომ ახლა აუცილებელია ხელშეკრულების პირობების ჩამოყალიბება, სადაც მკაფიოდ იქნება ჩამოყალიბებული უკრაინისა და რუსეთის მოთხოვნები ომის დასრულებასთან დაკავშირებით. მან დასძინა, რომ ამის შემდეგ საჭიროა ქვეყნის პოზიციების „გაერთიანება“.

„ნამდვილად მჯერა, რომ ჩვენ ცეცხლის შეწყვეტის ზღვარზე ვართ, მაგრამ ორივე მხარეს მოუწევს კომპრომისზე წასვლა. არცერთი მხარე არ მიიღებს ყველაფერს, რაც სურს. მათ მოუწევთ რაღაცის დათმობა, რათა გადაწყვეტას მიაღწიონ. მაგრამ პრეზიდენტ ტრამპს შეუძლია ამის გაკეთება“, - განაცხადა კელოგმა.