აშშ-ის ტარიფების საპასუხოდ, კანადა 25%-იან ტარიფს დააწესებს ყველა იმ ავტომობილზე, რომელიც შეერთებული შტატებიდან შემოდის და არ შეესაბამება კანადა-აშშ-მექსიკის სავაჭრო შეთანხმებას (USMCA). ამის შესახებ კანადის პრემიერ-მინისტრმა მარკ კარნიმ 3 აპრილს ოტავაში გამართულ პრესკონფერენციაზე განაცხადა.

კანადის პრემიერ-მინისტრის თქმით, ტარიფები გავრცელდება ავტომობილებზე, რომლებიც თავისუფალი ვაჭრობის შეთანხმების მიღმაა, ასევე, არაკანადურ ავტონაწილებზე, რომლებიც USMCA-ს მოთხოვნებს აკმაყოფილებს.

ამავდროულად, კანადის სატარიფო ზომები არ ვრცელდება მექსიკაზე, მესამე ქვეყანაზე, რომელიც თავისუფალი ვაჭრობის შეთანხმების ნაწილია. 

„ჩვენი ძველი ურთიერთობა შეერთებულ შტატებთან მუდმივად გაღრმავებული ინტეგრაციით დასრულდა. 80-წლიანი პერიოდი, როდესაც შეერთებულმა შტატებმა გლობალური ეკონომიკური ლიდერის როლი იკისრა, დასრულდა“, - აღნიშნა კარნიმ.

კანადის პრემიერმა ასევე გამოთქვა რწმენა, რომ ნაკლებად სავარაუდოა, აშშ-ის ადმინისტრაციამ მიმდინარე სავაჭრო პოლიტიკა შეცვალოს, სანამ არ გახდება ნათელი, რომ ამერიკელი ოჯახები და მუშები მათგან ზარალდებიან.

ცნობისთვის, აშშ-ის პრეზიდენტის, დონალდ ტრამპის მიერ სხვადასხვა ქვეყნისთვის დაწესებული ტარიფები 10%-იდან 49%-მდეა. ამასთან, ტრამპმა ევროკავშირს – 20%-იანი, დიდ ბრიტანეთს კი 10%-იანი ტარიფები დაუწესა.  ასევე, ტრამპმა 25%-იანი ტარიფი დააწესა უცხოური წარმოების ყველა ავტომობილზე.