კანადამ ოფიციალურად მიმართა დიდი ბრიტანეთის ხელმძღვანელობით შექმნილ „გაერთიანებული საექსპედიციო ძალების“ სამხედრო კოალიციას გაწევრიანების მოთხოვნით, განაცხადა პრემიერ-მინისტრის მარკ კარნის ადმინისტრაციამ.

აღნიშნული ძალა, რომელიც ჩრდილოატლანტიკური ალიანსის (ნატოს) 10 წევრი სახელმწიფოსგან შედგება, სწრაფი რეაგირების სამხედრო პარტნიორობას წარმოადგენს.

„პრემიერ-მინისტრმა კარნიმ განაცხადა, რომ კანადამ ოფიციალური განაცხადი წარადგინა „გაერთიანებულ საექსპედიციო ძალებში“ (Joint Expeditionary Force) გაწევრიანების თაობაზე და მიესალმა დიდი ბრიტანეთის მხარდაჭერას ამ მნიშვნელოვან ინიციატივაში კანადის მონაწილეობის მიმართ“, - ნათქვამია კარნის ოფისის განცხადებაში.

კანადა, რომელიც ნატოს წევრია, ევროპულ ქვეყნებთან უფრო მჭიდრო სამხედრო თანამშრომლობისკენ ისწრაფვის, რადგან ცდილობს, შეერთებულ შტატებზე დამოკიდებულება შეამციროს.

მანამდე კარნი ჩრდილოეთ ინგლისში დიდი ბრიტანეთის პრემიერ-მინისტრ ენდი ბერნემს შეხვდა.

კარნის ოფისის ცნობით, ორი ქვეყნის ლიდერმა განიხილა თავდაცვის ინდუსტრიის სფეროში თანამშრომლობის შესაძლებლობები „გლობალური საბრძოლო ავიაციის პროგრამის“ (Global Combat Air Programme) ფარგლებში - ეს არის მოწინავე ავიაგამანადგურებლის პროექტი, რომელსაც კანადა 2026 წლის ივლისში დამკვირვებლის სტატუსით შეუერთდა.

„გაერთიანებული საექსპედიციო ძალების“ წევრები არიან დანია, ესტონეთი, ფინეთი, ისლანდია, ლატვია, ლიეტუვა, ნიდერლანდები, ნორვეგია, შვედეთი და გაერთიანებული სამეფო.