ევროპული დიპლომატიის ხელმძღვანელმა კაია კალასმა განაცხადა, რომ ევროკავშირმა იცის, რა უნდა გააკეთოს, თუ უნგრეთის ვეტო უკრაინის გაწევრიანებაზე არ იქნება დაძლეული. ამის შესახებ მან ლვოვში ჟურნალისტებს განუცხადა.

კალასმა აღნიშნა, რომ ევროკავშირს მტკიცედ სწამს, რომ ორმხრივმა საკითხებმა უკრაინის ევროკავშირში გაწევრიანება არ უნდა შეაფერხოს და ევროპული სტრუქტურები შესაძლო დაბლოკისთვის ემზადებიან.

„ჩვენ გვაქვს გეგმა B და გეგმა C. თუმცა, ჩვენი ყურადღება A გეგმაზეა გამახვილებული, რაც ყველას მხარდაჭერის მოპოვებას გულისხმობს“, - განაცხადა მან და გაიხსენა, რომ ევროკავშირი უნგრეთთან ვეტოს მოხსნის შესახებ დიალოგს აწარმოებს.

„უკრაინას თავისი საშინაო დავალება აქვს შესასრულებელი და ევროკავშირმაც უნდა შეასრულოს თავისი საშინაო დავალება. ჩვენ უნგრეთის მთავრობასთან ვმუშაობთ“, - დასძინა მან.

კალასის თქმით, თუ კომპრომისი ვერ მოიძებნა, ევროკავშირი მზადაა, იმოქმედოს.

„მაგრამ თუ ამან არ იმუშავა, ჩვენ უკვე ვმუშაობთ გეგმა B-ზე, მაგრამ არ გავამხელ. ჩვენ ჯერ კიდევ პროცესში ვართ. გაწევრიანების პროცესი, ან როგორც ჩვენ მას ვუწოდებთ, გაერთიანების პროცესი, მნიშვნელოვანია არა მხოლოდ უკრაინისთვის, არამედ ევროკავშირისთვისაც“, - განუცხადა ევროკავშირის ლიდერმა ჟურნალისტებს.