ევროკავშირის საგარეო პოლიტიკის ხელმძღვანელმა კაია კალასმა განაცხადა, რომ უკრაინისთვის 90 მილიარდი ევროს ოდენობის სესხის გაცემასთან დაკავშირებით „დადებით გადაწყვეტილებებს“ 22 აპრილს ელის.

როგორც Reuters-ი წერს, უნგრეთის საპარლამენტო არჩევნებში ვიქტორ ორბანის დამარცხებამ შესაძლოა, კიევისთვის რუსეთთან ომის დასაფინანსებლად სასწრაფოდ საჭირო სესხის გაცემას გზა გაუხსნას. აღსანიშნავია, რომ სესხის გაცემას უნგრეთის პრემიერ-მინისტრი ბლოკავდა. 

„90-მილიარდიან სესხთან დაკავშირებით დადებით გადაწყვეტილებებს ხვალ ველით“, - განუცხადა კალასმა ჟურნალისტებს ლუქსემბურგში ევროკავშირის საგარეო საქმეთა მინისტრების შეხვედრის წინ. 

„უკრაინას ეს სესხი ნამდვილად სჭირდება და ეს ასევე იმის ნიშანია, რომ რუსეთი უკრაინას ვერ გაუძლებს. ეს ამ მომენტში უაღრესად მნიშვნელოვანია“, - დასძინა მან.

ამ მოსაზრებას იზიარებს ირლანდიის საგარეო საქმეთა მინისტრი ჰელენ მაკენტი.

„ევროკავშირისთვის მართლაც მნიშვნელოვანია, რომ მივაღწიოთ პროგრესს 90 მილიარდი ევროს სესხის საკითხში, მივაღწიოთ პროგრესს სანქციების მე-20 პაკეტთან დაკავშირებით და შევძლოთ რუსეთზე რაც შეიძლება მეტი ზეწოლის განხორციელება“, - განაცხადა მან.

„ბოლო კვირების განმავლობაში რამდენიმე კოლეგასთან ერთად უკრაინაში ვიყავი და ძალიან ნათელია, რომ ჩვენ იმ კრიტიკულ ზღვარზე ვართ, როდესაც ეს სესხი აბსოლუტურად აუცილებელია“, - დასძინა მაკენტიმ.