ევროკავშირის უმაღლესი დიპლომატი კაია კალასი მიიჩნევს, რომ რუსეთი ცდილობს, მოლაპარაკებების მაგიდასთან მიაღწიოს იმას, რისი მიღწევაც ბრძოლის ველზე ვერ შეძლო. ამის შესახებ მან კიევში ევროკავშირის საგარეო საქმეთა საბჭოს არაფორმალური შეხვედრის დაწყებისას განაცხადა.

სიტყვით გამოსვლისას კალასმა ხაზგასმით აღნიშნა, რომ იმისთვის, რომ მშვიდობა გრძელვადიანი იყოს, ის სამართლიანი უნდა იყოს.

„რუსეთი ცდილობს, მოლაპარაკებების მაგიდასთან მიაღწიოს იმას, რისი მიღწევაც ბრძოლის ველზე ვერ შეძლო. ყველამ ვიცით, რომ დონბასი რუსეთის საბოლოო მიზანი არ არის. დღეს დილით ბუჩაში შეგვახსენეს, თუ რა დევს სასწორზე. რუსეთის სისასტიკის უკეთესი მაგალითი არ არსებობს, ვიდრე ის, რაც იქ ოთხი წლის წინ მოხდა“, - განაცხადა მან.

ევროკავშირის უმაღლესმა დიპლომატმა ასევე ხაზგასმით აღნიშნა, რომ პასუხისმგებლობა „ძალიან მნიშვნელოვანია და გადამწყვეტია ხანგრძლივი მშვიდობისთვის“.

„სწორედ ამიტომ მიიწევს წინ ევროკავშირი სპეციალური ტრიბუნალის შექმნისკენ, რათა ომში პასუხისმგებელ პირებს პასუხი აგებინოს. ევროკავშირი ასევე ხელმძღვანელობს ძალისხმევას, შეიქმნას სარჩელების კომისია, რათა უკრაინელ ხალხს შეეძლოს რუსეთის ომის შედეგად მიყენებული ნგრევისთვის კომპენსაციის მოთხოვნა“, - დასძინა კალასმა.