ევროკავშირის უმაღლესი დიპლომატი კაია კალასი გამოეხმაურა ისრაელის საგარეო საქმეთა მინისტრის გიდეონ საარის განცხადებას, რომ ის კალასთან ყველანაირ კონტაქტს წყვეტს.

როგორც X-ზე გამოქვეყნებულ განცხადებაში კალასმა აღნიშნა, ევროკავშირსა და ისრაელს ბევრი საერთო ინტერესი აქვთ, იგი აფასებს დიალოგსა და ჩართულობას და მზადაა, ურთიერთობა ამ სულისკვეთებით,  „პატივისცემით და კონსტრუქციულად“ გააგრძელოს.

„დიალოგი დიპლომატიის საფუძველია, განსაკუთრებით მაშინ, როდესაც უთანხმოება წარმოიშობა. ევროკავშირი ისრაელთან კონსტრუქციული ურთიერთობის ერთგულია. ახლო აღმოსავლეთში მშვიდობის დასამყარებლად ორი სახელმწიფოს პრინციპზე დაფუძნებული გადაწყვეტა ერთადერთ სიცოცხლისუნარიან გზად რჩება. ევროკავშირი გმობს ისრაელის უკანონო დასახლებებს დასავლეთ სანაპიროზე, რაც ამ მიზნის მიღწევას სულ უფრო ართულებს. ეს არის ევროკავშირის პოზიცია“, - დაწერა კალასმა.

ცნობისთვის, ისრაელის საგარეო საქმეთა მინისტრმა გიდეონ საარმა განაცხადა, რომ ყოველგვარ კონტაქტს წყვეტს ევროკავშირის საგარეო პოლიტიკის ხელმძღვანელთან კაია კალასთან, მას შემდეგ, რაც გავრცელდა ინფორმაცია, რომ კალასმა ღაზასა და დასავლეთ სანაპიროზე პალესტინელების მიმართ ისრაელის პოლიტიკა სამხრეთ აფრიკაში 1990-იანი წლების დასაწყისამდე არსებულ აპარტეიდის სისტემას შეადარა.

Dear Gideon, as you know, the EU and Israel have a lot that binds us. I value our dialogue and engagement, and I’m open to continue in that spirit, respectfully and constructively. Dialogue is the foundation of diplomacy, especially when differences arise. The EU is always…

— Kaja Kallas (@kajakallas) June 18, 2026