ევროკავშირის საგარეო პოლიტიკის ხელმძღვანელმა კაია კალასმა განაცხადა, რომ ისრაელის დასახლებებთან ვაჭრობის აკრძალვის შესახებ ბლოკის გადაწყვეტილება პრინციპული პოზიციის გამოვლინება იქნება.

The Irish Times-თან ინტერვიუში კალასმა აღნიშნა, რომ ევროკავშირი დასახლებებს ისევე უნდა მოეპყროს, როგორც უკრაინის ყირიმს მას შემდეგ, რაც ის რუსეთმა დაიკავა.

„საკითხავი ისაა, როგორ მოვიქცეთ ამასთან დაკავშირებით? თუ მაგალითად ყირიმის ოკუპაციას ავიღებთ, მაშინ ყველაფერი ძალიან ნათელი იყო, რომ ეს უკანონოა, ჩვენ ამას არ ვაღიარებთ, რაც იმას ნიშნავს, რომ ვწყვეტთ ყირიმიდან შემოსულ ნებისმიერ პროდუქტზე ვაჭრობას. ჩვენ უნდა გვქონდეს იგივე პრინციპული პოზიცია — თქვენ იცით, რომ ეს უკანონოა და ამას ყველა აღიარებს, — ამიტომ უნდა შევწყვიტოთ ვაჭრობა ოკუპირებულ [პალესტინურ] ტერიტორიებთან“, — განაცხადა კალასმა.

როგორც გამოცემა წერს, ისრაელის დასახლებებში წარმოებული საქონლის იმპორტის აკრძალვის შესახებ წინადადება შესაძლოა, დამტკიცდეს როგორც ევროკავშირის სავაჭრო ღონისძიება და არა როგორც საგარეო პოლიტიკური გადაწყვეტილება. ეს კი იმას ნიშნავს, რომ მის მისაღებად საჭირო იქნება არა წევრი სახელმწიფოების ერთსულოვანი თანხმობა, არამედ მხოლოდ მათი მნიშვნელოვანი უმრავლესობის მხარდაჭერა.

გერმანია, უნგრეთი, ჩეხეთი და სლოვენია ისრაელის წინააღმდეგ სანქციების დაწესებას ეწინააღმდეგებიან.