„ზელენსკისა და პუტინის შეხვედრა ალასკის სამიტამდე პროდუქტიული არ იქნება“, - აღნიშნავს აშშ-ის ვიცე-პრეზიდენტი ჯეი დი ვენსი Fox News-თან ინტერვიუს დროს. მისი თქმით, დონალდ ტრამპი უნდა იყოს ის, ვინც უკრაინისა და რუსეთის პრეზიდენტებს გააერთიანებს.

„არ ვფიქრობ, რომ უკეთესი იქნება თუ დონალდ ტრამპთან შეხვედრამდე, ვლადიმერ პუტინი და ვოლოდიმირ ზელენსკი ერთმანეთს უნდა შეხვდნენ. ეს არ იქნება პროდუქტიული ნაბიჯი. აშშ-ის პრეზიდენტმა უნდა გააერთიანოს ისინი. 

ჩვენ ყოველდღიურ რეჟიმში ვესაუბრებით უკრაინას. დღესაც მქონდა მათთან საუბარი, მარკო რუბიოც არაერთხელ ესაუბრა მათ. ჩვენ ვცდილობთ, რომ ეს დიალოგის რეჟიმი შევინარჩუნოთ და სწორედ, აქ უნდა აიძულოს პრეზიდენტმა ტრამპმა პრეზიდენტი ზელენსკი და პრეზიდენტი პუტინი, რომ რეალურად, დასხდნენ და გადაწყვიტონ უთანხმოება“, - განაცხადა ვენსმა.

მისივე თქმით, ტრამპისა და პუტინის მომავალი შეხვედრა დიპლომატიური გარღვევაა. 

„ვლადიმერ პუტინმა არაერთხელ აღნიშნა, რომ ის არასდროს დაჯდება მოლაპარაკებების მაგიდასთან ზელენსკისთან ერთად. ჩვენ ახლა იმ ეტაპზე ვართ, რომ შევცვალოთ ეს დამოკიდებულება და სამივე ლიდერმა განიხილოს კონფლიქტის მშვიდობიანად მოგვარების გზა“, - ამბობს აშშ-ის ვიცე-პრეზიდენტი.