იტალიის პრემიერ-მინისტრი ჯორჯია მელონი მიიჩნევს, რომ ევროპული ქვეყნები, რომლებიც აშშ-ის ტარიფებით დაზარალდნენ, უნდა ეცადონ მათ მოხსნას მოლაპარაკებების გზით და არა საპასუხო ტარიფების დაწესებით, წერს იტალიური მედია.

მელონის თქმით, არსებობს სხვადასხვა ვარიანტი აშშ-ის ტარიფებზე რეაგირებისთვის და იტალიამ თავისი წინადადებები  ევროპელ პარტნიორებს უნდა გაუზიაროს.

„მაგალითად, არ ვარ დარწმუნებული, რომ საუკეთესო არჩევანია ტარიფებზე პასუხის გაცემა მეტი ტარიფით, რადგან ამან შეიძლება ჩვენს ეკონომიკაზე უფრო დიდი გავლენა იქონიოს, ვიდრე იმან, რაც ხდება ჩვენს საზღვრებს გარეთ”, - დასძინა მან.

იტალიის პრემიერ-მინისტრის თქმით, აუცილებელია, „საქმის არსთან დაკავშირებით ამერიკელებთან გულწრფელი დისკუსია დაიწყოს“, რათა „მივიდეთ გადასახადების გაუქმებამდე და არა მათ გაზრდამდე“.

შეგახსენებთ, დონალდ ტრამპის მიერ სხვადასხვა ქვეყნისთვის დაწესებული ტარიფები 10%-იდან 49%-მდეა. ტრამპმა ევროკავშირს - 20%-იანი და დიდ ბრიტანეთს 10%-იანი ტარიფები დაუწესა.