ისრაელის თავდაცვის მინისტრი ისრაელ კაცი აცხადებს, რომ ისრაელის ძალები სამხრეთ ლიბანიდან არ გავლენ.

კაცმა ეს განცხადება მას შემდეგ გააკეთა, რაც აშშ-სა და ირანს შორის ცეცხლის შეწყვეტა გამოცხადდა, რაც, სავარაუდოდ, „ჰეზბოლას“ წინააღმდეგ ბრძოლის დასრულებასაც მოიცავს.

„პრემიერ-მინისტრი ბენიამინ ნეთანიაჰუ და მე ვხელმძღვანელობთ მკაფიო პოლიტიკით, რომელიც განსაზღვრავს, რომ ისრაელის თავდაცვის ძალები დარჩებიან უსაფრთხოების ზონებში ლიბანში, სირიასა და ღაზაში, ყოველგვარი დროში შეზღუდვის გარეშე, რათა იქიდან დაიცვან საზღვარი და ისრაელის თემები ჯიჰადისტური ელემენტებისგან“, - განაცხადა ისრაელის თავდაცვის მინისტრმა. 

მისი თქმით, უსაფრთხოების ზონები „გაიწმინდება ადგილობრივი მოსახლეობისგან და განადგურდება ყველა ტერორისტული ინფრასტრუქტურა, მიწისზედა და მიწისქვეშა, მათ შორის სახლები საკონტაქტო ხაზის სოფლებში, რომლებიც ტერორისტულ ფორპოსტს წარმოადგენდნენ“.

კაცის თქმით, უსაფრთხოების ზონების შენარჩუნება ომში „ისრაელის თავდაცვის ძალების ერთ-ერთი უდიდესი მიღწევაა“. „ჩვენ ვეწინააღმდეგებით ლიბანიდან ისრაელის თავდაცვის ძალების გაყვანას, არსებული და მომავალი ზეწოლის მიუხედავად“, - აღნიშნა მან.

„პრემიერ-მინისტრმა ნეთანიაჰუმ ეს საკითხები ნათლად განუმარტა აშშ-ის პრეზიდენტ ტრამპს და სხვა მაღალი რანგის ამერიკელ თანამდებობის პირებს და მე ეს გუშინ აშშ-ის ომის მდივან პიტ ჰეგსეთსაც განვუმარტე“, - განაცხადა მან და დასძინა, რომ ისრაელის თავდაცვის ძალები ასევე მხარს უჭერენ ლიბანში უსაფრთხოების ზონის შენარჩუნებას.

„ჩვენ არ დავთმობთ ისრაელის უსაფრთხოების ინტერესებსა და ჩვენი მოქალაქეების დაცვას და არ გავალთ უსაფრთხოების ზონებიდან. თუ ირანი ლიბანში განვითარებული მოვლენების გამო ისრაელს თავს დაესხმება, ჩვენ მას სრული ძალით დავარტყამთ“, - აღნიშნა კაცმა.