ისრაელის თავდაცვის მინისტრმა ისრაელ კაცმა განაცხადა, რომ ისრაელის მთავარ მიზნად რჩება მძევლების დაბრუნება და იმის უზრუნველყოფა, რომ ღაზაში „ჰამასი“ აღარ არსებობდეს. 

„მანევრი ორი მიზნის მიღწევას ისახავს მიზნად — მძევლების დაბრუნებას და იმის უზრუნველყოფას, რომ „ჰამასი“ აქ აღარ არსებობდეს. ჩვენ ამ მიზანს არ დავთმობთ“, - განაცხადა კაცმა რაფაჰში ისრაელის თავდაცვის ძალების სამხედროების მონახულებისას. 

„მტრის მოკვლა, მძევლების სახლში დაბრუნება და გამარჯვება - ეს არის ჩვენი მისია. არ არსებობს შანსი, რომ ჩვენ ამაზე უარს ვიტყვით, ან კომპრომისზე წავალთ. „ჰამასი“ არ შეცვლილა. მას სურს, გააგრძელოს ის, რაც გააკეთა და გაანადგუროს [ისრაელი]“, - დასძინა მან.

კაცმა ასევე დაადანაშაულა „ჰამასი“ ირანთან თანამშრომლობაში, რათა განეხორციელებინა ისრაელის განადგურების გეგმა სარაკეტო თავდასხმებით და ღაზიდან, სირიიდან, ლიბანიდან, იორდანიიდან და სხვა ფრონტებიდან შეჭრის კოორდინაციით.