ისლანდიას შეუძლია ევროკავშირში გაწევრიანების შესახებ მოლაპარაკებები წელიწად-ნახევარში დაასრულოს და თანამეგობრობის 28-ე წევრი გახდეს. ამის შესახებ ქვეყნის საგარეო საქმეთა მინისტრმა თორგერდურ კატრინ გუნარსდოტირმა Politico-სთან ინტერვიუში განაცხადა.

ისლანდია ევროპის ეკონომიკური ზონის წევრია და შენგენის თავისუფალი გადაადგილების ზონის ნაწილია, ამიტომ მის კანონმდებლობაში უკვე შედის ევროკავშირის მრავალი კანონი. შედეგად, თუ ისლანდიელები რეფერენდუმზე მოლაპარაკებების განახლებას მხარს დაუჭერენ, „ჩვენთვის არც ისე რთული იქნება“ და „საკმაოდ სწრაფი პროცესი იქნება“ ევროკავშირში გაწევრიანების შესახებ მოლაპარაკებების დასრულება, განაცხადა გუნარსდოტირმა.

კითხვაზე, შეუძლია თუ არა ისლანდიას ევროკავშირში გაწევრიანების შესახებ მოლაპარაკებებში გაუსწროს კანდიდატებს, როგორიცაა მონტენეგრო, და გახდეს ევროკავშირის 28-ე წევრი, მინისტრმა უპასუხა: „დიახ“. თუმცა, მან დასძინა, რომ „ყველაზე დიდი გამოწვევა, რა თქმა უნდა, თევზჭერა იქნება“.

მისივე თქმით, მაშინაც კი, თუ ისლანდიელები აგვისტოში მოლაპარაკებების განახლებას მხარს დაუჭერენ, მოლაპარაკებების დასრულების შემდეგ კიდევ ერთი კენჭისყრა მაინც იქნება საჭირო.

თუმცა, როგორც გუნარსდოტირმა აღნიშნა, „გეოპოლიტიკური ტურბულენტობის“ პერიოდში ბლოკში გაწევრიანების სარგებელი შთამბეჭდავია. „ასევე ძალიან მნიშვნელოვანია ჩვენი ბიზნესებისთვის, ჩვენი ინდუსტრიებისთვის, რომ უზრუნველვყოთ მათთვის უსაფრთხო თავშესაფარი და დავიცვათ ისინი კავშირის ფარგლებში. ჩვენ ყოველთვის უფრო მაღალი ინფლაცია და უფრო მაღალი საპროცენტო განაკვეთები გვაქვს, ვიდრე სხვა ევროპულ ქვეყნებს. ეკონომიკაში კი ძალიან ბევრი მონოპოლიაა“, - დასძინა მან.

მინისტრის თქმით, ევროკავშირი ასევე მიიღებს სარგებელს ბლოკში გეოსტრატეგიული და მდიდარი ისლანდიის მიღებით.

აგვისტოში ჩატარებული რეფერენდუმით „ჩვენ ძალაუფლებას ხალხს გადავცემთ. ვიტყოდი, რომ ისლანდიისა და ევროკავშირისთვის სასარგებლო იქნებოდა მოლაპარაკებების წარმოება ახლავე, არა ორ წელიწადში, ან თუნდაც მოგვიანებით, არამედ ახლავე“, - განაცხადა ისლანდიის საგარეო საქმეთა მინისტრმა.