ირანმა გააფრთხილა გაერთიანებული სამეფო და საფრანგეთი, თავი შეიკავონ ჰორმუზის სრუტეში ნებისმიერი სამხედრო გადაადგილებისგან, განცხადება მას შემდეგ გაკეთდა, რაც ლონდონმა და პარიზმა განაცხადეს, რომ მზად არიან, ნაოსნობის თავისუფლების დასაცავად საჭიროების შემთხვევაში თავიანთი სამხედროები გაგზავნონ. 

„როგორც პასუხისმგებელი სახელმწიფო და ჰორმუზის სრუტის უსაფრთხოების გარანტორი, ირანი აფრთხილებს ყველა მხარეს, თავი შეიკავონ ამ სტრატეგიულ წყლებში სამხედრო გადაადგილებისგან“, - აღნიშნა ირანის საგარეო საქმეთა მინისტრის მოადგილემ ქაზემ ღარიბაბადიმ.

მისი თქმით, ჰორმუზის სრუტის უსაფრთხოებაზე პასუხისმგებლობა მის სანაპიროზე განლაგებულ სახელმწიფოებს ეკისრებათ.

გაერთიანებულმა სამეფომ და საფრანგეთმა 3 ივლისს კიდევ ერთხელ დაადასტურეს, რომ საერთაშორისო სამართლისა და ნაოსნობის თავისუფლების დაცვის მიზნით ძალისხმევას გააძლიერებენ. ამ მიმართულებით მათ აპრილში 51 ქვეყნის მონაწილეობით საერთაშორისო სამიტიც გამართეს.

კვირის დასაწყისში თეირანმა ასევე უარყო ემანუელ მაკრონის განცხადება, რომლის თანახმადაც, საფრანგეთი, ომანი და სხვა პარტნიორები ჰორმუზის სრუტის დანაღმული მონაკვეთების გაწმენდაზე ითანამშრომლებდნენ. ირანის განცხადებით, მსგავსი სამუშაოების განხორციელებას მხოლოდ ირანი განახორციელებს. 

تنگه هرمز میدان نمایش نظامی قدرت‌های فرامنطقه‌ای نیست. ایران به‌عنوان قدرت مسئول و ضامن امنیت تنگه، نسبت به هر حرکت نظامی در این آبراه حساس هشدار می‌دهد. امنیت هرمز با دولت‌های ساحلی است؛ بحران‌سازان مسئول پیامدهای ماجراجویی خود خواهند بود؛ این هشدار جدی است. pic.twitter.com/v9n2GdHnb6

— Gharibabadi (@Gharibabadi) July 4, 2026