ირანის საგარეო საქმეთა მინისტრის აბას არაღჩის განცხადებით, ირანი არ გეგმავს შეერთებულ შტატებთან მოლაპარაკებების წარმოებას და თეირანი ბრძოლის გაგრძელებას აპირებს.

არაღჩიმ ეს განცხადება მას შემდეგ გააკეთა, რაც აშშ-ის პრეზიდენტმა დონალდ ტრამპმა განაცხადა, რომ ვაშინგტონმა თეირანს სამშვიდობო გეგმა შესთავაზა.

„ამჟამად ჩვენი პოლიტიკა წინააღმდეგობის გაგრძელებაა“, - განაცხადა არაღჩიმ სახელმწიფო ტელევიზიით და დასძინა: „ჩვენ არ ვაპირებთ მოლაპარაკებებს - ჯერჯერობით არანაირი მოლაპარაკებები არ გამართულა და მე მჯერა, რომ ჩვენი პოზიცია სრულიად პრინციპულია“.

„ახლა მოლაპარაკებებზე საუბარი დამარცხების აღიარებას ნიშნავს“, - აღნიშნა მან. 

არაღჩიმ ასევე განაცხადა, რომ ჰორმუზის სრუტე „მხოლოდ მტრებისთვისაა დაკეტილი“.

„ჩვენი პერსპექტივიდან, ჰორმუზის სრუტე სრულად დაკეტილი არ არის — ის მხოლოდ მტრებისთვისაა დაკეტილი. არ არსებობს მიზეზი, რომ ჩვენი მტრებისა და მათი მოკავშირეების გემებს გავლის უფლება მივცეთ“, - განაცხადა ირანის უმაღლესმა დიპლომატმა.

მისივე თქმით, თეირანის შეიარაღებულმა ძალებმა მეგობარი ქვეყნების გემებისთვის უკვე „უზრუნველყვეს უსაფრთხო გავლა“.