ირანის საგარეო საქმეთა მინისტრი აბას არაღჩი აცხადებს, რომ მისი ქვეყანა მზადაა, გააგრძელოს თავდასხმები იქამდე, ვიდრე საჭირო იქნება. ამასთან, იგი გამორიცხავს მოლაპარაკებებს მას შემდეგ, რაც აშშ-ის პრეზიდენტმა დონალდ ტრამპმა განაცხადა, რომ ირანთან ომი „მალე“ დასრულდება.

„სროლა გრძელდება და ჩვენ კარგად ვართ მომზადებულები, რომ გავაგრძელოთ მათზე თავდასხმა ჩვენი რაკეტებით იმდენ ხანს, რამდენიც საჭირო იქნება და რამდენიც დასჭირდება“, - განუცხადა არაღჩიმ ამერიკულ მაუწყებელ PBS News-ს.

მისი თქმით, შეერთებულ შტატებთან მოლაპარაკებები დღის წესრიგში აღარ დგას.

„ამერიკელებთან საუბრის ძალიან მწარე გამოცდილება გვაქვს“, - აღნიშნა მან და დასძინა, რომ ირანზე აშშ-ის ორივე თავდასხმა, ივნისშიც და ახლაც, ქვეყნებს შორის წარუმატებელი მოლაპარაკებების შემდეგ მოხდა. 

მოლაპარაკებები „ჩვენს დღის წესრიგში აღარ არის“, - განაცხადა ირანის საგარეო საქმეთა მინისტრმა. 

მისივე თქმით, აშშ-მა და ისრაელმა ომის პირველ დღეებში ირანში რეჟიმის შეცვლა „ვერ შეძლეს“ და ახლა „უმიზნოდ“ ​​არიან.