ირანის საგარეო საქმეთა მინისტრის აბას არაღჩის განცხადებით, ირანმა და შეერთებულმა შტატებმა ჟენევაში ირანის ბირთვული პროგრამის შესახებ მოლაპარაკებების მეორე რაუნდზე შეთანხმებას მიაღწიეს, თუმცა სამუშაო ჯერ კიდევ ბევრია.

მოლაპარაკებების დასრულების შემდეგ მან ირანულ მედიას განუცხადა, რომ პროგრესი არ ნიშნავს, რომ შეთანხმება მალე იქნება მიღწეული, თუმცა პროცესი დაწყებულია.

ის მოლაპარაკებებს „კონსტრუქციულს“ უწოდებს, თუმცა ამბობს, რომ მოლაპარაკებების მესამე რაუნდის თარიღი ჯერ არ არის დადგენილი.

ირანის სახელმწიფო მედიის ინფორმაციით, ირანი დროებით ჩაკეტავს ჰორმუზის სრუტის ნაწილს - გლობალური ნავთობმიწოდების სასიცოცხლოდ მნიშვნელოვან მარშრუტს. ეს ხდება აშშ-თან ბირთვულ პროგრამაზე მიმდინარე მოლაპარაკებების ფონზე, მაშინ როდესაც ვაშინგტონმა ყურის რეგიონში სამხედრო ძალები გაგზავნა თეირანზე ზეწოლის მოსახდენად და დათმობების მისაღწევად.

აშშ-ის პრეზიდენტმა დონალდ ტრამპმა განაცხადა, რომ თეირანში „რეჟიმის შეცვლა“, შესაძლოა, საუკეთესო რამ იყოს, რაც შეიძლება მოხდეს, ხოლო ირანის უზენაესმა ლიდერმა, აიათოლა ალი ხამენეიმ, დღეს განაცხადა, რომ აშშ-ის ნებისმიერი მცდელობა მისი მთავრობის დამხობისა წარუმატებელი იქნება.