მომავალი წლის აპრილიდან, ინგლისში 16 წლამდე ასაკის პირებისთვის კოფეინით მდიდარი ენერგეტიკული სასმელების გაყიდვა აიკრძალება. ამის შესახებ Skynews იუწყება.

მოზარდებისთვის ლიტრზე 150 მგ-ზე მეტი კოფეინის შემცველი ენერგეტიკული სასმელების გაყიდვა ყველა საცალო მაღაზიაში, მათ შორის ონლაინ, მაღაზიებში, რესტორნებსა და კაფეებში უკანონო იქნება. ენერგეტიკული სასმელები ასევე აიკრძალება ყველა სავაჭრო აპარატიდან, რათა 16 წლამდე ასაკის პირებმა ვერ შეძლონ მათი იქ შეძენა.

ჩაი, ყავა და კოფეინის დაბალი შემცველობის გამაგრილებელი სასმელები, როგორებიცაა კოკა-კოლა და პეპსი - დაშვებული იქნება ყველა სუპერმარკეტში, თუმცა, სასმელები, რომლებიც ამჟამად არღვევენ ლიმიტს და რომლებიც აკრძალვის ნაწილი იქნებიან, მოიცავს Red Bull-ს, Monster-ს, Relentless-ს და Prime-ს. მათ უკვე აქვთ გაფრთხილებები, რომ ისინი არ არის რეკომენდებული ბავშვებისთვის. 

მსხვილმა სუპერმარკეტებმა უკვე ნებაყოფლობით შეწყვიტეს სასმელების გაყიდვა ახალგაზრდებისთვის, თუმცა ჯანდაცვის დეპარტამენტის თქმით, კვლევის თანახმად, ზოგიერთი მცირე ზომის მაღაზია კვლავ ყიდის მათ ბავშვებს.

„ჩვენ ვიცით ახალგაზრდებისთვის რა ზიანი მოაქვს ენერგეტიკულ სასმელებს. ისინი გავლენას ახდენენ მათ ძილზე, კლასში კონცენტრაციასა და ქცევაზე“, - აღნიშნულია ინგლისის ჯანდაცვის მინისტრის შერონ ჰოჯსონის განცხადებაში.

ინგლისში დაახლოებით 100 000 ბავშვი სვამს კოფეინით მდიდარ ენერგეტიკულ სასმელებს.