1764515381
უცხოეთი
ჰონკონგის საცხოვრებელ კომპლექსში ხანძრის შედეგად დაღუპულთა რაოდენობამ 140-ს გადააჭარბა
ჰონკონგის საცხოვრებელ კომპლექსში ხანძრის შედეგად დაღუპულთა რიცხვი გაიზარდა. ჰონკონგის ხელისუფლების წარმომადგენლების თქმით, ამჟამად კომპლექსში 146 ცხედარია ნაპოვნი.
ჰონკონგის პოლიციის დაშავებულთა განყოფილების ხელმძღვანელმა შუკ-ინ ცანგმა განაცხადა, რომ კიდევ ასი ადამიანი დაკარგულად ითვლება. მისივე თქმით, დიდი ალბათობით, ყველა მათგანი დაღუპულია.
ჰონკონგის მაღალსართულიან კომპლექსში ხანძარი ოთხშაბათს გაჩნდა. მეხანძრეებმა ცეცხლის სრულად ჩაქრობა მხოლოდ პარასკევს შეძლეს.
ჰონკონგის პოლიციის ცნობით, დაკავებულია 11 პირი, მათ შორის იმ კომპანიის თანამშრომლები, რომლებიც კორპუსებში სარეაბილიტაციო სამუშაოებს აუცილებელი რეგულაციების დაცვის გარეშე ახორციელებდნენ. გამოძიებამ დაადგინა, რომ ადგილზე არც სახანძრო სიგნალიზაცია მუშაობდა გამართულად.
