თურქეთის საგარეო საქმეთა მინისტრმა ჰაკან ფიდანმა განაცხადა, რომ ანკარამ რუსეთსა და უკრაინას შავ ზღვაში სიტუაციის დეესკალაციის შესახებ წინადადებები გაუგზავნა და პასუხს ელის.

თურქეთის საგარეო საქმეთა მინისტრმა ამ წინადადებების დეტალები არ დააკონკრეტა.

„როგორც ჩანს, ამჟამად გრძელვადიანი შედეგის მიღწევა გარკვეულწილად რთულია. გავაგრძელებთ ომს, რომლის დამანგრეველ ხასიათსაც ყველა მხარე საკმაოდ კარგად აცნობიერებს და რომელიც ახლა თანდათან ნელდება, თუ ვიპოვით გონივრულ კომპრომისს და ვიტყვით: „მოდით, ნუღარ გავანადგურებთ ერთმანეთს“. ჩვენ ორივე მხარეს გავუგზავნეთ წინადადება და ველოდებით პასუხს. ვხედავთ, რომ თუ ყანებიდან შეგროვებული მარცვლეული გლობალურ ბაზრებამდე არ მიაღწევს, ბევრ ქვეყანას სურსათის უვნებლობის პრობლემები შეექმნება“, - განაცხადა ფიდანმა.

მინისტრმა გაიხსენა, რომ 2022 წელს თურქეთისა და გაეროს დახმარებით რუსეთი და უკრაინა შეთანხმდნენ შავი ზღვის პორტების განბლოკვაზე და უკრაინული მარცვლეულის უსაფრთხო ექსპორტის უზრუნველყოფაზე.

„სინამდვილეში, რამდენიმე წლის წინ ჩვენ ხელი მოვაწერეთ შეთანხმებას, რომელიც შემდგომ დაირღვა, მაგრამ, ამის მიუხედავად, ფუნქციონალური სისტემა არსებობდა - მხარეები ერთმანეთის საქმეებში არ ერეოდნენ. თუმცა ახლა ისინი აქტიურად ერევიან ერთმანეთის საქმეებში. კერძოდ, ისინი თავს ესხმიან პორტებს და ყველა სახის საზღვაო საქმიანობას“, - აღნიშნა ოფიციალურმა პირმა.

„გულწრფელად რომ ვთქვათ, ჩვენ ვცდილობთ, ეს საკითხი ლოგიკურ დასკვნამდე მივიყვანოთ. ამ შემთხვევაში, რთულია მხარეთა პოზიციების შეჯერება იმ გაკვეთილების საფუძველზე, რომლებიც წინა შეთანხმების განხორციელების პროცესში მივიღეთ“, - დასძინა ფიდანმა.