ბუნდესვერის გენერალური ინსპექტორი კარსტენ ბროიერი მიიჩნევს, რომ რუსეთი ნატოზე შეტევას 2029 წელს შეძლებს და ეს შესაძლოა, უფრო ადრეც მოხდეს. ამის შესახებ მან გაზეთ Süddeutsche Zeitung-ისთვის ბრიტანელ კოლეგასთან რიჩარდ ნაიტონთან ერთად  მიცემულ ინტერვიუში განაცხადა.

„სხვადასხვა ინდიკატორი - იარაღი, პერსონალის ზრდა, ეკონომიკური და პოლიტიკური ცვლილებები - ერთ თარიღზე მიუთითებს: 2029 წელი. შეიძლება ეს უფრო ადრე მოხდეს? დიახ“, - აღნიშნა ბროიერმა.

„სწორედ ამიტომ გვჭირდება, პირველ რიგში, საბრძოლო მზადყოფნა; მეორე, 2029 წლისთვის საბრძოლო შესაძლებლობების გაძლიერება და მესამე, ტექნოლოგიური უპირატესობა 2035 წლისთვის და შემდგომ პერიოდში. ახალი სამხედრო სტრატეგია და საბრძოლო შესაძლებლობების პროფილი განსაზღვრავს წინსვლის გზას“, - დასძინა გერმანელმა მეთაურმა.

ბრიტანელმა მეთაურმა განაცხადა, რომ ზუსტი თარიღის პროგნოზირება რთულია.

„თუმცა ტენდენცია აშკარაა: საფრთხე იზრდება. რუსეთი ომს აწარმოებს უკრაინაში, სწავლობს ამ გამოცდილებიდან და ავითარებს ახალ ტექნოლოგიებს. პუტინმა კი აჩვენა სუვერენულ სახელმწიფოებზე შეტევის მზადყოფნა. რაც უფრო უახლოვდები რუსეთის საზღვარს, მით უფრო იგრძნობა ეს“, - აღნიშნა რიჩარდ ნაიტონმა.