კატარი რამდენიმე კვირაში თხევადი ბუნებრივი აირის (LNG) წარმოებას სრულად აღადგენს, - განუცხადა კატარის პრემიერ-მინისტრმა შეიხ მოჰამედ ბინ აბდულრაჰმან ალ-თანიმ Financial Times-ს.

სახელმწიფო ენერგოკომპანია QatarEnergy-მ ომის პირველ დღეებში ფორსმაჟორი გამოაცხადა, რადგან ირანული დარტყმების შედეგად დაზიანდა ქვეყნის მთავარი გაზის ცენტრი - Ras Laffan Industrial City, რის გამოც კომპანიამ კონტრაქტების სრულად შესრულება ვერ შეძლო.

აშშ-ის ენერგეტიკული ინფორმაციის ადმინისტრაციის მონაცემებით, კატარი მსოფლიოში თხევადი ბუნებრივი აირის ერთ-ერთი უდიდესი ექსპორტიორია და გლობალური ექსპორტის დაახლოებით 20%-ს უზრუნველყოფს.

„რამდენიმე კვირაში წარმოება ნორმალურ დონეს დაუბრუნდება, დაზიანებული ობიექტის გარდა“, - განაცხადა ალ-თანიმ.

მისივე თქმით, QatarEnergy ფორსმაჟორის რეჟიმს მხოლოდ მაშინ გააუქმებს, როდესაც დარწმუნდება, რომ ყველა პრობლემა აღმოფხვრილია და ოპერირება სრულად უსაფრთხოა.

კატარი, რომელიც პაკისტანთან ერთად აშშ-სა და ირანს შორის მოლაპარაკებების შუამავალი იყო, ელოდება, რომ ჰორმუზის სრუტეში საზღვაო გადაზიდვები უახლოეს კვირებში ჩვეულ რეჟიმს დაუბრუნდება.