20-პუნქტიანი სამშვიდობო გეგმის საწყის პროექტებში, რომლებიც აშშ-ის ხელმძღვანელობით რუსეთსა და უკრაინას შორის მიმდინარე მოლაპარაკებებში განიხილება, უკრაინის ევროკავშირში გაწევრიანების თარიღად 2027 წელია განსაზღვრული. თუმცა ეს დებულება ამჟამად გადახედვის პროცესშია, ევროკავშირის ცალკეული წევრი სახელმწიფოების მხრიდან არსებული წინააღმდეგობის გამო. ამის შესახებ Financial Times-ი წერს.

გამოცემის ცნობით, სწორედ ევროკავშირის შიგნით კონსენსუსის არარსებობამ განაპირობა უკრაინის გაწევრიანების კონკრეტული ვადების გადახედვა, მიუხედავად იმისა, რომ ვაშინგტონი კიევის ევროინტეგრაციას განიხილავდა, როგორც უფრო ფართო მშვიდობიანი დარეგულირების ერთ-ერთ საკვანძო კომპონენტს.

ევროპული და ევროატლანტიკური ინტეგრაციის საკითხებში უკრაინის ვიცე-პრემიერმა ტარას კაჩკამ ხაზგასმით აღნიშნა, რომ უკრაინის ევროკავშირში გაწევრიანებას ყველა წევრი სახელმწიფოსგან „ძალიან თამამი პოლიტიკური ნება“ სჭირდება.

„უკრაინისა და ევროპისთვის მნიშვნელოვანია, რომ ევროკავშირის ყველა ქვეყანამ მკაფიო პოლიტიკური ვალდებულება აიღოს ჩვენი გაწევრიანების მიმართ რაც შეიძლება მალე, სასურველია კონკრეტული თარიღით“, - აღნიშნა კაჩკამ.

მან დაადასტურა, რომ კიევი კვლავ იმედოვნებს ევროპული ინტეგრაციის პროცესის დაჩქარებას სამშვიდობო შეთანხმებების ფარგლებში, თუმცა აღიარა, რომ გაწევრიანების თარიღი ჯერ არ არის შეთანხმებული.

პარალელურად, ევროკავშირი განიხილავს თავად გაფართოების მექანიზმის გადახედვის შესაძლებლობას, კერძოდ, ორდონიანი წევრობის მოდელის შექმნას. ეს მიდგომა უკრაინას საშუალებას მისცემს, შეუერთდეს ევროკავშირს ყველა მოთხოვნის სრულად დაკმაყოფილებამდეც კი, მაგრამ გარკვეული უპირატესობების შეზღუდული ხელმისაწვდომობით.

ევროკომისიის პრეზიდენტმა ურსულა ფონ დერ ლაიენმა რამდენიმე დღის წინ განაცხადა, რომ უკრაინა შესაძლოა, ევროკავშირში გასაწევრიანებლად 2030 წლისთვის იყოს მზად. ამავდროულად, კაჩკას თქმით, გეოპოლიტიკური აუცილებლობის გათვალისწინებით, ეს პროცესი შეიძლება მნიშვნელოვნად შემცირდეს, თუმცა საბოლოო ვადები მოლაპარაკებების საგნად რჩება.

უკრაინას, აშშ-სა და ევროკავშირს შორის მოლაპარაკებები ასევე მოიცავს ომის შემდგომი რეკონსტრუქციის დაფინანსებას, რომლის მოცულობა შეფასებულია დაახლოებით 800 მილიარდ ევროდ 2040 წლამდე, ასევე შემდგომი ფინანსური დახმარების გაცემისა და ანტიკორუფციული ვალდებულებების შესრულების პირობებს.